कुशल नृत्य निर्देशक गोरनके निधन

पहुरा समाचारदाता
धनगढी, २३ असार । थारु समुदायसे प्रतिनिधित्व करटी स्थानीय तथा राष्ट्रियस्तरमे अपनहे कुशल रूपमे स्थापित करैना सफल हस्ती गोरन चौधरीके मृत्यू हुइल बा ।
उहाँ यिहे असार १९ गते शुकके रोज काठमाण्डौके चपली हाइट्मे मोटरसाइकल सवार उहाँ रातके डोजरमे टक्राके दुर्घटनामे परल रहिट । उपचारके क्रममे टिचिङ हस्पिटलमे मंगरके रोज उहाँक निधन हुइल राष्ट्रिय थारु कलाकार मञ्चके अध्यक्ष विनय बैद्य बटैलै ।
निर्देशक गोरन कला नृत्य विधामे उच्च योगदान पुगैटी नेपालके सास्कृतिक विकासमे अतुलनीय योगदान पुगैले रहिट । उहाँ सास्कृतिक क्षेत्रमे नक्षेत्र चम्किला तारा, नेपाल छमछमी आइडल १ के तारा, सयौं मेला महोत्सवमे सुन्दर नृत्य प्रस्तुतिसे मोहित बनैले रहिट ।
इतिहासमे पहिल चो प्रदेश न. ५ एक्सपोमे ३ सय जानेक सामुहिक सखिया नृत्यके कोरियोग्राफ करल, थारु, नेपाली, भोजपुरी लगायत टमान भाषा भाषीके गित तथा म्युजिक भिडियोमे अभिनय तथा कोरियोग्राफ फे करल राष्ट्रिय थारु कलाकार मञ्चके अध्यक्ष बैद्य बटैलै ।
कुशल नृत्य निर्देशक एवम सास्कृतिक सस्थानमे प्रशिक्षक हुके हजारौ विद्यार्थीनहे नृत्य विधामे प्रशिक्षित करल उहाँ सदाके लाग संसार छोरल मञ्चके अध्यक्ष बैद्य बटैलै ।