अश्लिल भिडियो सार्वजनिक कैके युवतीहे आत्महत्या दुत्साहान करल आरोपमे युवक पक्राउ
धनगढी, २८ वैशाख । युवतीके अश्लिल भिडियो सार्वजनिक कैके आत्महत्या कैना दुत्साहान करल आरोपमे एक युवक पक्राउ परल बाटै ।
पक्राउ परुइयामे कञ्चनपुर बेलौरी नगरपालिका वडा नम्बर ७ के २३ वर्षीय सन्तराम चौधरी रहल जिल्ला प्रहरी कार्यालय कैलालीके प्रवक्ता प्रहरी नायब उपरिक्षक दक्षकुमार बस्नेत बटैलै ।
यूवती शनिच्चरके सकारे धनगढी उपमहानगरपालिका वडा नम्बर ६ जालीके सुकुटी नालामे झुण्ड्याके आत्महत्या करल रही । गौरीगंगा ९ शंकपुरके १९ वर्षीय लक्ष्मी देउवाके फेसबुकसे अश्लिल भिडियो ओ फोटो पोष्ट करल यूवकहे आरोप बा ।
अश्लिल भिडियो ओ फोटा फेसबुक मार्फत सार्वजनिक हुइलपाछे यूवती आत्महत्या करल उजुरीके आधारमे चौधरीहे प्रहरी पक्राउ करल हो ।
यूवकके मोवाईलमे सार्वजनिक हुइल अश्लिल भिडियो, फोटु ओ फेसबुक आईडी समेत लगईन अवस्थामे भेटल प्रहरी नायब उपरिक्षक बस्नते बटैलै । घटनाके अनुसन्धान हुइटी रहल प्रहरी जनैले बा ।
मुलुकी अपराध संहिता २०७४ मे कोइ किहुहे आत्महत्या कैके दुरुत्साहन कैना वा ओइसीन काम कैनासमके परिस्थिति खडा करल वा कराइलमे पाँच बरससम कैद ओ पचास हजार रूपैयाँसम जरीवाना करैना कानूनी व्यवस्था रहल बा ।
