भारतमे अक्के दिन ४ हजार ढिउर कोरोना संक्रमित

काठमाण्डौं, २९ वैशाख । पाछेक २४ घण्टामे भारतमे कोरोना भाइरस (कोभिड–१९) के चार हजार दुई सय १३ लौव संक्रमित भेटल बाटै ।
भारतके स्वास्थ्य मन्त्रालयसे डेहल जानकारी अनुसार यी संगे भारतमे समग्र संक्रमितके संख्या ६७ हजार एक सय ५२ पुगल बा । ओस्टके पाछेक २४ घण्टामे कोरोना भाइरससे ९७ जनहनके मृत्यु हुइल बा । यी संगे कोरोना भाइरससे मृत्यु हुउइयाके संख्या फेन दुई हजार दुई सय ६ पुगल बा ।
भारतके सबसे प्रभावित राज्य महाराष्ट्रमे अब्बेसम सबसे ढिउर २२ हजार एक सय ७१ जने संक्रमित पुगल बाटै कलेसे यी राज्यमे अब्बेसम आठ सय ३२ जनहनके कोरोना भाइरसके कारण मृत्यु होसेकल बा ।
गुजरातमे अब्बेसम आठ हजार एक सय ९४ जने संक्रमित फेला परल बाटै । गुजरातमे यी भाइरससे मृत्यु हुउइयाके संख्या चार सय ९३ पुगल बा । मध्यप्रदेशमे अब्बेसम तीन हजार ६ सय १४ जने संक्रमित हुइबर दुई सय १५ जनहनके मृत्यु होसेकल बा । ओस्टके पश्चिम बंगालमे अब्बेसम एक हजार नौ सय ३९ जने संक्रमित होसेकल बाटै कलेसे एक सय ८५ जने मनैनके मृत्यु होसेकल बा ।
उत्तर प्रदेशमे अब्बेसम तीन हजार चार सय ६७ जने संक्रमित भेटलमे ७४ जनहनके मृत्यु हुइल बा । बिहारमे अब्बेसम ६ सय ९६ जनहनमे कोरोना भाइरसके संक्रमण डेखल बा कलेसे ६ जनहनके मृत्यु हुइल बा । अब्बेसम भारतमे २० हजार नौ सय १७ संक्रमित ठीक होके घर जासेकल बाटै ।