हुलाकी सडक स्तरोन्नतिके काम सुरु
पहुरा समाचारदाता
धनगढी, ८ अगहन । धनगढी–भजनी–सत्ति हुलाकी सडक खण्ड ओ लम्की–टीकापुर–खक्रौला सडकके स्तरोन्नतिके काम सुरु करल बा ।
कैलाली जिल्लामे पर्ना ८३.७ किलोमिटर हुलाकी सडक स्तरोन्नतिके (चाकर) बनैना काम सुरु हुइल हो । सडकके ठेक्का होसेकलपाछे हुलाकी सडक आयोजना कार्यालय धनगढी ओ निर्माण कम्पनी ज्वाइन्ट सर्भे ओराके निर्माणकार्य आघे बर्हल आयोजनाके इन्जिनियर पदम मडै बटैलै ।
धनगढी–भजनी–सत्तिसमके ४४ किलो मिटर ओ लम्की–टीकापुर–खक्रौलासमके ३९.७ किलोमिटर सडक चौडा बनाइक लाग सात खण्डमे ठेक्का लगाइल बा । धनगढी–भजनी–सत्तिसमके चार खण्डमध्ये तीन खण्ड स्वछन्द जोशी ओ चौथो खण्ड कालिका जोशी जेभीसे निर्माणके जिम्मेवारी पैले बावै । लम्की–टीकापुर–खक्रौलासमके ३ खण्डमध्ये कालिका सुमार्गील एक खण्ड ओ खड्का कृष्ण जेभी दुई खण्ड निर्माण कैना सम्झौता हुइल इन्जिनियर मडै बटैलै ।
साढे दुई अर्बके लागत अनुमान करल हुलाकी सडक स्तरोन्नति करेबर धनगढीके क्याम्पसरोडसे मनहेरासम तीन किलोमिटर चार लेन ओ बाँकी ८०.७ किलोमिटर दुई लेनके बनाजैना बा । अब्बे हुलाकी सडकमे एक लेन (साढे तीन मिटर) किल कालोपत्रे करल बा ।
पहिले क्याम्पसरोडसे कनरीसमके ७ किलोमिटरके लागत ३७ करोड, दुसरा खण्ड कनरीसे फुलबारीसमके १२ किलोमिटरके लागत ३२ करोड, तिसरा खण्ड फूलबारीसे कटौनीसमके ७ किलोमिटरके लागत २८ करोड ओ चौथो खण्ड कान्द्रासे सत्तीसमके १३ किलोमिटरके लागत ३२ करोड ७२ लाख रहल इन्जिनियर मडै बटैलै ।
इन्जिनियर मडैके अनुसार हुलाकी सडकके चौडाइ अलकत्रा प्रविधिसे बनाजैना बा । अब्बेक हुलाकी सडक ओटासिल प्रविधिसे निर्माण हुइल बा । जौन निर्माण सम्पन्न नाइ हुइटी भत्कल बा । इन्जिनियर मडै पुरान सडकहे फेन अलकत्रा प्रविधिमार्फत नै स्तरोन्नति करजैना बटैलै । उहाँ एक साइडके सडक निर्माण नाइ हुइटसम औरे साइडमे मर्मत किल करजैना बटैलै । उहाँ एक साइडके निर्माण ओरैलेसे किल औरे साइड निर्माण करजैना बटैलै ।
सडक चौडा करक लाग गैल अगहनमे बोलपत्र आह्वान करलेसे फेन सम्झौता यिहे असार ३० गते होके सावन १ गतेसे काम सुरु करे पर्ना हुइल रहे । निर्माण कम्पनीसे २०७७ सावन १ गतेसे ३० महिनामे उ काम सम्पन्न कैना मेरके सम्झौता हुइल इन्जिनियर मडै बटैलै ।
बसन्ता वन क्षेत्रमे हुलाकी सडकके टुंगो नाइ लागल
बसन्ता वन क्षेत्र भिट्टरके दुई किलोमिटर हुलाकी सडक कहिया बनी कना आभिनसम टुंगो नाइ लागल हो ।
कैलालीमे पर्ना धनगढीसे सत्तीसमके ६२ किलोमिटर सडकमध्ये ४४ किलोमिटर पाँच बरस पहिले निर्माण हुइलेसे फेन उ क्षेत्रमे आभिनसम निर्माण नाइ हइल हो । कटैनीसे कान्द्रा लडियासमके १८ किलोमिटर सडक मध्ये १६ किलोमिटर नेपाल सरकारके लावा मापदण्ड अनुसार दुई लेन (सात मिटर पिच) सहितके लगभग निर्माण सम्पन्न होसेकल इन्जिनियर पदम मडै बटैलै । मने बसन्ता वन क्षेत्र भिट्टरके दुई किलोमिटर लम्बाइके सडक कहिया बनी कना आभिन टुंगो नाइलागल हो ।
डिभिजन वन कार्यालय कैलालीसे सडकमे पर्ना एक सय रुख्वा काटक लाग आदेश मागल फाइल आघे नाइ बर्हके उ स्थानमे हुलाकी सडकके ट्रयाकसमेत खोलल् नाइहो । इन्जिनियर मडै ईआर्ईए ओ आईईई कैके रुख्वामे टाँचासमेत लगा सेकल रलेसे फेन कटान आदेश नाइ पाइल ओरसे काम करे नाइ सेकल बटैलै ।
यहोर रुख्वा काटक लाग आदेश मागल फाइल विभागसे फिर्ता हुइल जनाइल बा । वन कार्यालयसे राखल सर्त पूरा नाइ करल ओरसे फाइल आघे नाइबर्हके फिर्ता हुइल डिभिजन वन कार्यालय कैलालीके रामचन्द्र कँडेल बटैलै । बसन्ता वन अन्तर्राष्ट्रिय जैविक करिडोर रहल ओरसे उ क्षेत्रमे वन्यजन्तुके अण्डर पास ओ ओभरपास अनिवार्य रूपमे बनाइ पर्ना सर्त राखल बा ।
