जनता आधारभूत सेवासे बञ्चित
पहुरा समाचारदाता
धनगढी,१८ अगहन । सर्वसाधारण जनताहुक्रे सहजुले पाई पर्ना आधारभूत सेवा सुविधासे बञ्चित हुइल एक कार्यक्रमके सहभागीहुक्रे बटैले बटै ।
इन्सेक सुदूरपश्चिम प्रदेश कार्यालयके आयोजनामे बुधके रोज धनगढीमे हुइल शिक्षा, स्वास्थ्य, खाद्य ओ आवास अधिकारमे सवालमे प्रदेश सरकारके भूमिका विषयक कार्यक्रममे मानविय आवश्यकता पुरा कैना उ सेवा सुविधासे बञ्चित हुइल सहभागीनसे बटागिल रहे ।
इन्सेक प्रदेश संयोजक खडकराज जोशी सर्वसाधारण जनता शिक्षा, स्वास्थ्य, खाद्य ओ आवास अधिकारमे बञ्चित हुइल बटैलै । उहाँ कहलै, ‘विद्यालयमे विद्यार्थी अन्सार शिक्षक दरबन्दी नइरना, विद्यालयमे राजनीति हुइना, परिवर्तित पाठयक्रम अन्सार शिक्षकहुकन तालिमके अभाव, कोभिड संक्रमणके परिस्थितिमे भर्चुअल कक्षा संचालन करेबेर सक्कुहुनके प्रविधिके पहुँच नइरना ओ लकडाउनके बेला विद्यालय बन्द रहल मने अभिभावक हुकनसे महिनाके फि असुलल करल अवस्था बा ।’
स्वास्थ्यके क्षेत्रमे निःशुल्क पैना विरुवाके कमी, सरकारके स्वास्थ्य विमा प्रभावकारी नइरहल ओ स्वास्थ्य क्षेत्रमे अनुगमनके अभाव रहल उहाँ कहलै । धान गोहुँ खेतीके सिजनमे मलखाद नइपाके किसानमे नैरश्यता पैदा हुइल, कृषकमुखी कार्यक्रममे सरकारके ध्यान नइपुगल संयोजक जोशी कहलै ।
मानव अधिकार समुह गोदावरीके संयोजक नरदिप धामी कोभिडके कारण दीर्घरोगी स्वास्थ्य सेवासे बञ्चित हुइल बटैलै । उहाँ कहलै, ‘सरकारी कार्यालय, विद्यालयमे अपाङमैत्री भवन नइहो, छात्राहुकनके लाग अग्गे शौचालयके अभाव, नेपाल सरकारसे किसानहुकनके आवश्यकता अनुसार मल पुगाई नइसेकल अवस्था रहल बा ।’ सहकारीसे वितरण हुइना मल व्यापारीके गोदाम, एग्रोभेटमे मिलल उहाँ बटैलै ।
साल्ट ट्रेडिङ कर्पोरेशन लिमिटेडके नायव महाप्रबन्धक केशवप्रसाद पाण्डे अपन भागमे परल ३० प्रतिशत अनुदानके मल नानल बटैलै । उहाँ कहलै, ‘ओकर अलवा हम्रे गैरअनुदानित मल नानके विक्री करलपाछे किसानहुकन कुछ सहजुल हुइल बा, ७० प्रतिशत मल नन्ना जिम्मेबारी पाइल कृषि सामग्री कम्पनी लिमिटेड सक्कु मल नन्लेसे मलके अभाव सिर्जना नैहुई ।’
‘जथाभावी अन्धाधुन्ध रुपमे युरिया ओ डिएपी मल प्रयोग कैना प्रवृत्तिसे मलके खपतफे बह्रके यिहीसे यहाँके खेटुवा मरुभूमिकरण हुइना डर रहल उहाँ कहलै । लिमिटेड सावनसे कार्तिकसम अनुदानित मल ४ हजार ४ सय ७७ मेट्रिकटन ओ गैरअनुदानित मल ३२ सय २२ मेट्रिकटन मल नानके निरन्तर विक्री वितरण करटी रहल उहाँ जनैलै । साल्ट ट्रेडिङ कर्पोरेशन लिमिटेड डिएपी मलके विकल्पमे प्रयोग करे सेक्ना सिङल सुपर फस्पेट (एसएसपी) दुई हजार ३ मेट्रिकटन बिक्री करल बटैलै ।
कृषि सामग्री कम्पनी लिमिटेड धनगढीके प्रमुख नवलसिंह बोगटी तोकल कोटा अन्सारके मल समयमे आपूर्तिके व्यवस्थापन कैनामे हुइटी रहल कमी कमजोरीसे मल अभावकर चरम अभाव हुइटी रहल बटैलै ।
प्रदेशभर वार्षिक ३५ से ५० हजार मेट्रिकटन मल चाहठ, आजकाल्ह धानगोहुँ संगे टिना, मकै, केरा खेती लगायत टमान व्यवसासयिक खेती बह्रटी गैलपाछे मलके आवश्यकताफे बह्रटी गैल उहाँ कहलै । सरकारसे मलखाद बिक्री वितरणके लाग जारी करल निर्देशिका २०७७ मे नगरपालिकारगाउँपालिकाके उपप्रमुखरउपाध्यक्षके संयोजकत्वमे मलखाद आपूर्ति समिति गठनके व्यवस्था करल उहाँ कहलै । निर्देशिका पालना हुइलेसे किसानहुकनहे मलखादके समस्या भोगे नइपर्ना उहाँ कहलै ।
कार्यक्रममे कृषि ज्ञान केन्द्रके कृषि प्रसारक अधिकृत जनकराज बोहरा कृषकहुकन माग अन्सार कृषि यन्त्र पुगाई नइसेकल बटैलै । उहाँ कहलै, माग ढेर रना मने बजेट कम रना विदम्बना बा । खाद्य व्यवस्था तथा व्यापार कम्पनी धनगढीके कल्पना विष्ट सरकार कोटा अन्सार केल धान खरिद करेसेकल बटैली । कार्यक्रममे राष्ट्रिय मानव अधिकार आयोग प्रदेश संयोजक मोहन जोशी लगायत सरोकारवाला निकायके सहभागिता रहे ।
