थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]
‘ अन्तर्वार्ता ’

माग, मुद्दामे अडिग रहल ओरसे जित सुनिश्चित बा

पहुरा | ३० कार्तिक २०७९, बुधबार
माग, मुद्दामे अडिग रहल ओरसे जित सुनिश्चित बा

भजनी नगरपालिका–२, मोहनपुरके गंगा चौधरी नागरिक उन्मुक्ति पार्टीके केन्द्रीय सदस्य हुइट् । २०७४ के आम निर्वाचनमे रेशम चौधरीहे जिटाइक लाग उहाँ अहोरात्र खटके महत्वपूर्ण भूमिका निर्वाह करले रहैं । ओस्टेके, २०७२ के थरुहट आन्दोलनमे फेन सक्रिय रुपमे लागल रहैं । उहाँ पहिलचो निर्वाचन लरटैं । कैलाली क्षेत्र नम्बर ३ से प्रतिनिधि सभा सदस्यके उम्मेदवार बटैं । प्रस्तुत बा प्रतिनिधि सभा सदस्यके उम्मेदवार गंगा चौधरीसंग करल बाटचिटके सारसंक्षेप ।

  • पहिलचो निर्वाचन लरटि । अप्नेक उम्मेदवारी कोहे ओ केकर लाग ?

नागरिक उन्मुक्ति पार्टी रहरसे खोलल नैहो । शोषण, दमन, अन्यायमे परल जनताके उन्मुक्तिके लाग खोलल पार्टी हो । हमार पार्टीके मुख्य एजेण्डा २०७२ सालमे घटल टीकापुर घटनामे हमार निर्दोष संघरियन जेलमे बटैं, उहाँहुकके रिहाइ करना हो । टीकापुर घटनाके बारेमे लाल आयोगके प्रतिवेदन, देवीराम शर्माके प्रतिवेदन, ओस्टेक मानव अधिकारवादी संस्थाके प्रतिवेदन, संसदीय दल लगायत टमान प्रतिवदन बा, उ प्रतिवेदनमे माननीय रेशम चौधरी लगायत सक्कु निर्दोष बटैं । आज आठ वर्ष पुगे लागल मने सरकार यी प्रतिवेदन सार्वजनिक करे सेक्ले नैहो । हम्रे जिटब कलेसे प्रतिवेदन सार्वजनिक करेपरि कना हमा मुख्य आवाज रहि ।

उ संगे भूगोलके रुपमे हेरना हो कलेसे क्षेत्र नम्बर ३ तीन पालिका मिलके बनल बा । भजनी, कैलारी ओ घोडाघोडी । यम्ने विशेष समस्या कलेक बाढ, डुबान समस्या हो । बाढ पीडितके समस्या बा । यहाँक जनताहुक्रे बर्सेनि बाढ, डुबानसे समस्याग्रस्त बटैं । टबेमारे बाढ पीडितके समस्या समाधानके लाग हम्रे आवाज उठैबि, पहल करब । ओ, वहाँ विकल्पमे कौनो खेती करलेसे मजा हुइ कलेसे, उ बाढ, डुबान ग्रस्त क्षेत्रमे हम्रे वैकल्पिक खेतीके लाग विशेष प्याकेज योजना नान्के काम करब । ओ, औरे किसानके समस्या ढेर बा, वहाँ । किसानके समस्या कलेक अभिनसम मलखाद नैमिल्ना, ओस्टेक बीउके समस्या बा । ओस्टेक, अब्बे हम्रे किसान गोहुँ बोइबेर बीया किन्लेसे, प्रति किलो कम्तीमे ७५ से २५० रुपैयाँ परठ । मने, जब किसान बिक्री करठ ३० रुपैयाँसे ढेरमे बिक्री नैहुइठ । टब, कैसिक किसानके उन्नति हुइ ? हम्रे किसानके समस्याके बारेमे सदनमे विशेष आवाज उठाब । अपन उत्पादन करल बीयाके किसान अप्नही मूल्य तोके पाइपरल । जस्टे, हम्रे देख्ठि, साबुन बनैना फ्याक्ट्री साबुनके मूल्य अप्नही तोकठ । ओम्ने मार्जिन निकारके मूल्य तोकल रहठ । ओस्टेक, सर्फके कम्पनी सर्फके मूल्य तोक्ले रहठ । टबेमारे किसानसे उत्पादन करल चिजके मूल्य किसान अप्नही तोके पाए कहिके किसानके पीडाहे सदनमे उठाब ।

ओस्टेक, युवा स्वरोजगारके बाट करलेसे हमार युवाहुक्रे डिग्री, ब्याचलर, इन्टर पास बटैं । टबफेन विदेश जाके काम करेपरना बाध्यता बा । उहाँहुक्रे यहैँ फलफूल खेती कैके रोजगार बने सेक्ही । उहाँहुक्रे सिमला जाके स्याउ टुरटि बटैं । उहाँहुक्रे यहैँ अनुदानमे व्यावसायिक तरकारी खेती, पशुपालन, माछा पालनमे संलग्न कराइ सेकजाइ ।

शिक्षाके हकमे हेरलेसे हम्रे यहाँ पाइलट ओ इन्जिनीयरह किल हमार जनशक्ति मन्ठि । शिक्षक, कृषक ओ व्यापारीहुक्रे फेन हमार देशके जनशक्ति हुइट । सक्कु ठाउँमे सामान शिक्षा हुइपरड कना महिन लागठ । विशेषकैके आब यी धनी गरिबके शिक्षा नाहोए । सबहे सामान शिक्षा रहे कना हमार एजेण्डा रहल बा ।

महिलाके हकम हेरलेसे ८७ प्रतिशत महिला अभिन घर गृहणीके काम करटिरहल बटैं । ओकर लाग फेन आवाज उठाइ परल । आब महिलाहुक्रे फेन राजनीतिमे आइ परल । व्यापार व्यवसायमे आइ परल कना हमार मान्यता बा ।

यहाँ पर्यटनके क्षेत्रमे फेन हमार उहाँ टमान प्राकृतिक सम्पदा बा । जस्टे, भजनीके हकमे फेन वहाँ प्राकृतिक ताल बा । जस्टे, पुरैना ताल, उ संरक्षण करना हमार मुख्य योजना बा । भजनीमे लौकहुवा भौकहुवा ताल, घोडताल बा । यी तालके संरक्षण करे सेक्लेसे पर्यटनके विकासके साथे हमार आर्थिक स्तरोन्नति हुइ । घोडाघोडीके हकमे घोडाघोडी ताल, ओस्टेक चिडिया ताल, ओजुवा ताल बा । कैलारीके हकमे कोइलही ताल लगायत टमान ताल बा । यी तालके संरक्षण करेसेक्लेसे पर्यटकीय क्षेत्रके रुपमे विकास करे सेकजाइ ।

विशेषकैके नेपालके मोहना, पथरैया, कान्द्रा लडियामे बाढ आइल बेला डल्फिन मिल्ठैं । यी डल्फिनसंग जोडके पर्यटकीय विकास करे सेक्लेसे आर्थिक विकासके साथे युवाहे रोजगारी फेन मिलि ।

यी क्षेत्र बाढपीडित क्षेत्र रहल ओरसे हम्रे यिहिनहे बाढपीडित क्षेत्र घोषणा करे सेक्लेसे डगरघाट ओ लडियक कटान व्यवस्थित करे सेक्जाइ ।

  • अप्ने चुनाव लरटिरहल क्षेत्रमे सबसे ढेर कृषिके काम हुइठ । वहाँक कृषिहे व्यवसायीकरण ओ उत्पादन वृद्धि करनामे अप्नके योजना का बा ?

हमार किसानहुक्रे अभिन अप्नही विज्ञ नैहुइल हुइट । उहाँहुकनमे चेतनाके अभाव बा । मै यहाँ कृषि तालिमके आवश्यकता डेख्ले बटु । विशेषकैके आब मलखाद कैसिक प्रयोग करना ? कौन समयमे मलखाद टपड्रेस करना ? कौन समयमे सिँचाइ करना ? जस्टे आब टमान अवस्था रहठ । धानके अवस्था कलेसे गाम्हर हुइना अवस्था रहठ, टब बालाके आकृति लग्ना अवस्था रहठ । यी तरकारीमे फेन फूला लग्ना, फल लग्ना अवस्था रहठ । ओम्हे हमार किसानहुक्रे अनविज्ञ बटैं । यी अवस्थाके बारेमे तालिम उहाँहुक्रे प्राप्त करलेसे यम्ने फेन रासायनिक विषादीके प्रयोग ढेर हुइल ओरसे कृषि जमिन बिग्रटि बा । यम्ने किसानहे हम्रे तालिम डेहे सेकब, जनचेतना नाने सेकब कलेसे उत्पादन वृद्धि हुइ ओ अर्गानिक तरकारी खेती व्यावसायिक रुपमे करे सेकब कलेसे किसानके आर्थिक स्थिति सुधार हुइ जस्टे महिन लागठ ।

  • सिँचाइके सबसे भारी समस्या बा, यकर लाग अप्नेक योजना का बा ?

सिँचाइके लाग का बा कलेसे, हम्रे यहाँ डीप ट्युवबेल किल हेरठि । गाउँघरमे किसानके भाषामे कलेसे उहिनहे हम्रे बोरिङ सिँचाइ कठि । उ बोरिङ सिँचाइसे किल नैपुगठ । खासकैके समय अनुसार खेती करे परठ । हमार टमान ढेर पानीके स्रोत खेर गिल अवस्था बा । खाली हम्रे बोरिङके किल भर करब कलेसे सिजनमे सक्कु बोरिङ चललओरसे पानी कम अइना, सुख्खा हुइना अवस्था फेन डेख्ले बटि । ओहे सकारण नहर सिँचाइके लाग योजना नन्ना, नहर सिँचाइ हुइ कलेसे पानी घटैना बह्रैना समस्या नैरहि ओ खेर जैटिरहल पानीके सदुपयोग करे सेक्ना महिन लागठ । अइसिन योजनाके बारेमे विशेष जोर करब ।

  • बाढ प्रभावित क्षेत्र घोषणाके बाट करलि, उ घोषणा करेक लाग अप्नेक ओरसे का पहल रहि ?

मोर मान्यता टे का हो कलेसे मै किल बोलके नैपुगि । स्थानीय सरकार बाढपीडित क्षेत्र घोषणा करना कहिके निर्णय कैसेक्ले बा । मै जिटम कलेसे केन्द्रमे संसद भवनमे बाढपीडित क्षेत्र घोषणाके लाग आवाज मै उठाइम । ओस्टेक प्रदेशके सदनमे फेन आवाज उठाइ परि । बाढपीडित क्षेत्र घोषणाके नीति बा । यम्ने डगरघाट निर्माणसे लेके लडिया नियन्त्रणके बाट बा । यी आवश्यक नीति फेन सम्बोधन करि । नीति अनुसार काम हुइलेसे बाढपीडितके समस्या समाधान हुइना जस्टे महिन लागठ ।

  • अप्नेक प्रतिस्पर्धा केकरसंग हुइ ?

प्रतिस्पर्धाके हकमे कलेसे गठबन्धनसंग हमार प्रतिस्पर्धा नैहुइ जस्टे लागठ । जनता का कहटै कलेसे गठबन्धन कलेक खाली कुर्सीके लाग किल हो । गठबन्धनसंग हमार प्रतिस्पर्धा नैहुइ । यी क्षेत्रमे हमार प्रतिस्पर्धा एमालेसंगे हुइ जस्टे लागठ ।

  • टब्टे गठबन्धनसे अप्ने आघे बटि ?

हो, गठबन्धनसे हम्रे एकडम आघे बटि ।

  • अप्नेक चुनाव जिट्ना आधार का–का हो टे ?

चुनाव माग, मुद्दा ओ संगठनसे जिट्ना हो । हमारसंग संगठन बा । प्रत्येक गाउँमे टोल–टोलमे हमार संगठन बा । जस्टे अब्बे चुनाव प्रचारप्रसार समिति फेन प्रत्येक टोल–टोलमे गठन करले बटि । संगठन चुनाव जिट्ना हो । हमार माग मुद्दा, जोन हम्रे माग, मुद्दा ढरले बटि, उ माग मुद्दासे हम्रे चुनाव अवश्य जिटब । ओ, हम्रे एक संकल्प फेन करब । जस्टे, चुनाव जिटलबाद भ्रष्टाचार नैकरब ओ भ्रष्टाचार करे फेन नैडबि । कृषि जमिनके खण्डीकरण नैकरब । कौनो योजनासे लाभ फेन नैलेब । सार्वजनिक सम्पत्तिके दोहन नैकरब । राजनीतिक भेदभाव हम्रे नैकरब । ओहे कारण माग, मुद्दामे अडिग होके हम्रे आघे बह्रल बटि । हमार जित फेन सुनिश्चित बा ।

जनाअवजको टिप्पणीहरू