धनगढीमे अपांगता युवा उद्यमशिलता स्वरोजगार महोत्सव हुइना

पहुरा समाचारदाता
धनगढी, १४ अगहन । ३२ औ अन्तर्राष्ट्रिय अपांगता दिवसके अवसरमे अपांगता रहल युवाहुकनहे आय आर्जन ओ रोजगारीसंग जोरना सीपयुक्त युवाहुकनके दक्षता ओ क्षमता प्रदर्शनीके लाग धनगढीमे अपांगता युवा उद्यमशिलता स्वरोजगार महोत्सव हुइना जनागिल बा ।

रास्ट्रिय अपांग महासघ नेपाल सुदूरपश्चिम प्रदेश धनगढी, कैलालीके आयोजनामे सुदूरपश्चिम प्रदेशके धनगढीमे अपांगता रहल नागरिकके रोजगारी ओ दिगो जिविकोपार्जनमे पहुँच बह्रैना अपांगता रहल नागरिकभिटर रहल ज्ञान सीप ओ प्रतिभाहे उजागर कैना उद्देश्यसे यी बर्ष महोत्सवके आयोजना करे लागल महासंघ प्रदेश अध्यक्ष मानबहादुर साउद बटैलै ।

महोत्सवसे अपांगता रहल नागरिकके सहज व्यावसाय, स्वरोजगारी, सम्मानित जीवन ओ दीर्घकालीन आर्थिक सामाजिक पुनस्र्थापित सेवा प्रदान करटी अपने गाउँ घरमे सहज रुपमे रोजगारी प्राप्त कैना ओ व्यवसायिक उत्पादन सामग्रीके प्रचार प्रसारसंगे विभेदरहित समतामूलक समाज निर्माणमे नीजी ओ सार्वजनिक क्षेत्रके भुमिका अभिवृद्धि कैना महासंघके अध्यक्ष बटैलै ।

सुदूरपश्चिम प्रदेशके अस्थायी राजधानी रहल कैलालीस्थित धनगढी उप महानगरपालिका आघेक ग्राउण्डमे पहुँचयुक्त स्थानमे यिहे अगहन १७ ओ १८ गते २ दिने अपांगता युवा उद्यमशिलता स्वरोजगार महोत्सव हुइना उहाँ बटैलै ।
महोत्सवमे मंचसहितके कम्तीमे १० ठो प्रदर्शनी स्टल निर्माण ओ मिडिया ब्रिफिङ हुइना महासंघके महासचिव नन्दराज भट्ट बटैलै ।

ओस्टेक करके प्रदर्शनी स्टलमे अपांगता नागरिकसे अपन ज्ञान सीप ओ कला प्रयोग करके तयार करल उत्पादन सामग्रीके शो तथा अपने ज्ञान ओ विज्ञता प्रस्तुती कैना, सीप युक्त अपांगता युवाके बायोग्राफीफे प्रस्तुत कैना उहाँ जनैलै । प्रदर्शनी स्टलमे उद्योग वाणिज्य, राजनीतिक व्यक्तित्व ओ सामाजिक क्षेत्रके महत्वपूर्ण व्यक्तित्वहुकनके भ्रमण तथा अवलोकन रहना उहाँ बटैलै ।

महोत्सवमे अपांगता समावेशी जिविकोपार्जनके सम्भावना ओ चुनौती विषयक कार्यशाला, अपांगता नागरिकहे रोजगार प्रदान करटी रहल प्रदेशस्थित व्यावसायिक फर्म, कम्पनी ओ व्यक्तित्वहुकनहे सम्मान कैना, टमान समावेशी विशेष ओ श्रोत विद्यालयमे अध्ययनरत मेधाबी प्रतिभावान विद्यार्थीहुकनहे सम्मान कैना, समावेशी दिगो जिविकोपार्जन सम्बन्धी टमान साङगितिक कार्यक्रम, नयाँ सीपयुक्त अपांगता युवाहसकनहे स्वरोजगारी ओ व्यवसाय सुरुवात सहयोगके अवसर प्रदान हुइना कहल बा ।

महोत्सवमे सीप ओ दक्षता प्रदर्शन कैना ५० जाने ढेर युवायुवतीके सहभागिता रना ओ करिब २५० जाने ढेर उ कार्यक्रमके अवलोकन कैना आकलन करल बा ।

महोत्सव आयोजनासे अपांगता नागरिकसेफे कुछ करे सेक्ठै ओ आत्मनिर्भर बने सेक्ठै कना सन्देश डेनाके साथे अपांगता नागरिकके प्राविधिक प्रतिभाके उजागर नीजि क्षेत्र ओ सार्वजनिक क्षेत्रसंगके सहकार्य ओ साझेदारीके विकास कैना, व्यवसायिक नीजि तथा सार्वजनिक क्षेत्र प्रदेश ओ स्थानीय पालिकासंग साझेदारी समन्वय तथा बजारीकरण करके उद्योग व्यवसाय संचालन कैना अपांगता युवा उद्यमशिलता स्वरोजगार महोत्सवके प्रमुख उपलब्धी रना महासंघके महासचिव नन्दराज भट्ट बटैलै ।

रास्ट्रिय अपांग महासंघ नेपाल अपांगता रहल व्यक्तीहुकनके हक अधिकार संरक्षण ओ प्रबर्द्धनके लाग वि.स. २०५० सालसे निरन्तर कृयाशिल एक ठो केल रास्ट्रियस्तरके छाता सस्था हो । जेम्ने हाल ४०० से ढेर अपांगता सम्बन्धी काम कैना सस्था आबद्ध बटै । सुदूरपश्चिम प्रदेशमेफे २०६१ सालसे रास्ट्रिय अपांग महासघ निरन्तर क्रियाशिल बा । हाल यी प्रदेशमेफे ४२ ठो सस्था आवद्ध रहल बटै । २०७८ के जनगणना अनुसार सुदूरपश्चिम प्रदेशमे ७० हजार ८ जाने अपांगता रहल व्यक्ति रहल बटै । जेम्ने कैलालीमे २२ हजार ३६३ जाने अपांगता रहल व्यक्ति रहल महासंघ जनैले बा ।

सक्कु मेरिक अपांगता रहल व्यक्तिहुकनके सर्वाङिगण बिकास ओ अपांगता समावेशिताके सुनिश्चितता समाजमे रहल मानवीय विविधता बोकल अपाङगता रहल नागरिक, सडक बालबालिका, बेसहारा, असहाय, हिंसामे परल महिला, जेष्ठ नागरिक, दलित, मजदुर, किसान, लैंगिक अल्पसंख्यक, राउटे, राजी, बादी सिमान्तकृत समुदाय ओ राज्य विकासके मुल प्रवाहमे आइ नइसेकल हुइट ।

पाछे पारल, अपन ईच्छा, चाहना माग करे नइसेक्ना नागरिकहुकनके समाजमे सम्मानपुर्वक बाँचे पैना तथ्यमे विश्वास रख्टी मानवअधिकारके विश्वव्यापी घोषणा पत्र, अपाङगता रहल नागरिकके अधिकार सम्बन्धी संयूक्त राष्ट्र संघीय महासन्धी लगायत बालबालिका ओ महिला सम्बन्धी टमान अभिसन्धि ओ घोषणापत्र उप्पर दृढ विश्वास करटी नेपालके संविधानसे प्रदत्त मौलिक हक अधिकारहुकनहे आत्मसात करटी, लैंगिकता पक्ष ओ मानवीय विविधतायूक्त नागरिकके शिक्षा, स्वास्थ्य, रोजगारी, आयआर्जन, सीप विकास, सशक्तीकरण ओ पुनस्र्थापना मार्फत राष्ट्रिय नीति निर्माण तथा सर्वाङगीण राष्ट्र विकासके मुलप्रवाहमे समान सहभागिता एवं सेवामे सहज पहुँच पुगैना उद्देश्यसे “रास्ट्रिय अपांग महासघ नेपाल ” संस्था स्थापना करके सञ्चालन करल हो ।