थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४३, शुक्कर ]
[ वि.सं ३० श्रावण २०७७, शुक्रबार ]
[ 14 Aug 2020, Friday ]
‘ कैलारी गाउँपालिकामे विकास ’

समितिके नाउमे ठेकेदारसे बेगारी चुकैना काम

पहुरा | १५ श्रावण २०७७, बिहीबार
  • 164
  •  
  •  
  •  
  •  
  •  
  •  
  •  
    164
    Shares
समितिके नाउमे ठेकेदारसे बेगारी चुकैना काम

लखन चौधरी
धनगढी, १५ सावन ।
कैलालीके कैलारी गाउँपालिका–८ मे कोरोनाके कारण डेखैटी सडक ‘पानी पीच’ योजना अलपत्र पारगिल बा ।

उ वडाके दक्षिण टेडीसे बेनौली पेट्रोल पम्पसमके ८५० मिटर ग्राबेल सडकहे पानी पीच तथा कालोपत्रे कर्नासे पहिले करेक पर्ना स्तरोन्नतीके काम कर्ना कहटी निर्माण पक्ष बीच–बीचमे माटी किल कु≈याल । माटी कुर्यइना बाहेकके काम आघे बह्रे नैसेकलपाछे सडक अन्ततः हिल्लाहा होके आवातजवात बन्द बा ।

कैलारी गाउँपालिका–८ दक्षिण टेंढीके स्थानीय लक्ष्मण चौधरी असारमे आके कर्ना विकास स्थानीयबासीहुकन सुविधासे ढिउर दुःख किल डेहल बटैलै ।

‘आउर बेला सुतके बैठ्ना, अन्तिममे आके कबु लकडाउन टे कबु पानी परल कहटी बहानाबाजी कर्र्ना प्रबृतिसे विकासके काम अलपत्र पारगिल बा । बरवार सवारी साधनके टे बाटे नैहो, साइकल नेगैना कर्रा बा यी डगरमे’, उहाँ आपन घरेक आघे रहल हिल्लाहा सडक डेखैटी कहलै ।

टेंढीके डोसर स्थानीय हरिप्रसाद चौधरी आक्रोश पोख्टी कहलै–‘कि टे चालु अवस्थामे रहल सडकहे नैबिगारे परल, बनैना हो कसेले पूरा करके छोरे परल । ठेकेदार ओ नेताहुकनके नेंगना डगर नाई हो जे ? हम्रहिन टे साँझ विहान यहे डगर नैनेंगके सुख नैहो । जनताहुकन कबु यी, कबुु उ बहानामे परेसानी किल डेठै विकासके नाउमे ।’

यी सडक कैलारी गाउँपालिकाके वडा नं. ८ ओ ६ जोर्ना मुख्य सडक हो । उ सडकमे पानी पीच करेक लाग गाउँपालिका २० लाख बजेट बिनियोजन करल रहे । मने जारी लकडाउन ओ बर्खाहा पानीके कारण डेखैटी काम हुई नैसेकके हिल्लाइ किल होके आवातजावात बन्द हुइल हो ।

उपभोक्ता समितिमार्फत उ सडक निर्माणके लाग ठेकेदारहे निर्माणके जिम्मा लगागिल रहे । मने ठेकेदार उ काम करे नैसेकलपाछे अलपत्र परल हो ।

मने काम नैहुइलपाछे रकम भुक्तानी भर नैहुइल कैलारी गाउँपालिका जनैले बा । वडा नंं ८ के वडा अध्यक्ष दुखीराम कठरिया लकडाउनके कारण काम नैहुइल बटैटी बर्खा ओरैटी किल काम सूचारु हुइना दाबी कर्लै ।

कैलारी गाउँपालिका वडा नंं ६ बनकट्टामे बिग्रल पानी पीच सडक ।

गाउँपालिका गैल आव २०७६/२०७७ मे सक्कुु वडामे नमूना सडक बनैना कहटी १० ठो सडकके लाग २० लाखके दरसे २ करोड बजेट बिनियोजन करल रहे ।

मने अधिकांश सडक निर्माणमे बेगारी चुकैना काम किल हुइल स्थानीयबासीहुकनके गुनासो बा । काम करल कहल सडक असार नैओरैटी बिगरगिल रहे । हिल्लाहा हुइलपाछे स्थानीयहुकन आवातजावातमे समस्या हुइल हो ।

गाउँपालिकाके वडा नं. ६ बनकट्टामे निर्माण करल पानी पीच सडक असार नैबित्टी बिग्रलपाछे स्थानीय आक्रोशित हुइल बाटै ।

बनकट्टा गाउँक् भलमन्सा (प्रमुख) रातिराम चौधरी प्राविधिक ओ ठेकेदारके लापरवाहीसे काम गुणस्तरीय नैहुइल गुनासो पोख्लै । अत्राही किल नाई, कहाँ डारे पर्ना ग्राबेल कहाँ डारलपाछे सडक हिलाहा हुइल ओ पटक–पटक स्थानीयबासी ओ ठेकेदारबीच लफडा समेत हुइल भलमन्सा चौधरीके कहाइ बा ।

गाउँपालिकाके सबइन्जिनीयर गोविन्द रोकायाके अनुसार वडा नं. १ के हसुलिया बजारमे नाली निर्माण, वडा नं. २ के रामपुर, वडा नंं. ३ के भड्री, वडा नंं. ४ के के गाउँ, वडा नं. ५ के छोट्की पलिया, वडा नं. ७ के मोहनपुर, वडा नंं ९ के बनकनरीमे ओ कोइलही ताल जोर्ना सडकमे फेन पानी पीचके योजना रहे ।

मने हसुलिया बजारमे नाली निर्माण योजना बाहेकक योजना भर पूर्ण रुपमे सम्पन्न हुई नैसेकल हुइट । सब सबइन्जीनियर रोकायाके अनुसार सक्कु योजनामे ४५ से ६० प्रतिशत किल कार्य प्रगति हुइल जानकारी डेलै । उ सक्कुु योजनाके कामके लाग गाउँपालिका ओ उपभोक्ता समिति बीच समझौता हुइल रहे । मने उपभोक्ता समिति भर अप्नेु कामे नैकरके ठेकेदारमार्फत काम कराइल बटागिल बा ।

उ १० ठो योजना किल नाई, गाउँपालिकासे नौ वडामे १÷१ ठो सडक कालोपत्रे करेक लाग प्रति सडक ३० लाखके दरसे २ करोड ७० लाख बजेट बिनियोजन करल रहे । उ सक्कु योजना कार्यान्वयनके लाग फेन उपभोक्ता समिति ओ गाउँपालिकाबीच समझौता हुइल रहे ।

४० लाख बजेट रहल वडा नंं. २ के उजेलीसेमरसे बसौटीसमके २ किलोमिटर ६ सय मिटर सडक, ५० लाख बजेट रहल वडा नं. ७ के भुइयाफाँटा सशस्त्र प्रहरी बेस क्याम्पस्थित २ किलोमिटर सडक, २५ लाख बजेट रहल वडा नंं. ५ के गोबरैयाके १ किलोमिटर सडक योजना निर्माणके लाग फेन उपभोक्ता समिति संग समझौता हुइल रहे । कलेसे वडा नं ८ स्थित रामपुरसे डम्मारीसमके सडक खण्ड निर्माणके लाग ५० लाख ओ रामपुरमे डोसर्र सडक निर्माणके लाग ३२ लाख बजेट फेन गाउँपालिका ओ उपभोक्ता समिति बीच समझौता हुइल सबइन्जीनियर रोकाया बटैलै ।

कानूनी प्रावधान

सार्वजनिक खरिद नियमावली २०६४ के दफा ९७ अनुसार १ करोडसमके लागत अनुुमान रहल योजनाके काम उपभोक्ता समिति अर्थात लाभग्राही समुुदायसे काम कराई सेक्ना प्रावधान बा ।
उपभोक्ता समिति वा लाभग्राही समुदायसे सञ्चालन हुइना निर्माण कार्यमे लोडर, एक्साभेटर, रोलर, डोजर, ग्रेडर विटुमिन डिस्ट्रीव्युटर, विटुमिन ब्वाइलर जसिन हेभी मेशीन प्रयोग करे नैपैना कहल बा ।

अलपत्र छोरल कैलारी गाउापालिका वडा नंं ८ दक्षिण टेढीसे बेनौली पेट्रोल पम्पसमके सडक ।

मने लागत अनुमान तयार करेबर समयमे हेभी मेशीन प्रयोग करे पर्ना जटिल प्रकृतिके काम कहिके उल्लेख बा कलेसे सम्बन्धित प्राविधिकके सिफारिसमे सार्वजनिक निकायसे सहमति लेके ओइसिन मेशीन प्रयोग करेसेकजिना बा ।

ओस्टके उ नियमावलीके उपदफा (९क) के उपनियम (९) अनुसार के प्रतिबन्धात्मक वाक्यांश विपरीत हेभी मेशीन प्रयोग करल पैलेसे ओइसिन उपभोक्ता समिति वा लाभग्राही समुदायसंग हुइल सम्झौता रद्द करेसेकजिना कहल बा । उ नियमावलीके उपदफा १० अनुसार उपभोक्ता समिति वा लाभग्राही समुदाय पाइल काम अप्नही सम्पन्न करेक पर्ना बा ओ कौनो फेन निर्माण व्यवसायी वा सब–कन्ट्रयाक्टरसे कराई सेकजिना नैहो ।

नाउके किल उपभोक्ता समिति

मने गाउँपालिका अन्तरगतके विकासे योजना उपभोक्ता समितिमार्फत ठेकेदारसे धमाधम हुइल गाउँपालिका स्रोत बटैले बा । टेण्डर करेबर ढिउर समय लग्ना ओ बजेट फ्रिज जैना कहटी गाउँपालिकासे उपभोक्ता समितिहे विकासे योजना निर्माणके जिम्मा लगैटी आइल बा । मने उपभोक्ता समिति भर अप्ने कामे नैकरके ठेकेदारसे काम कराके कानूनके धज्जी उरैटी आइल बा ।

गाउँपालिकाके वडा नंं ३ मे ३० लाखके कालोपत्रे योजना ओ २० लाखके पानी पीच तथा स्तरोन्नतीके योजनाके काम भर स्थानीय उपभोक्ता समिति अप्नही करल बटागिल बा । उपभोक्ता समिति मेशीनरी औजार भाडामे प्रयोग करके निर्माण सम्पन्न करल गाउँपालिका जनैले बा । मने बाँकी सक्कु योजनाके काम उपभोक्ता समितिसे समझौता करके ठेकेदारसे काम करागिल हो ।

कौन सडक कौन ठेकेदार बनाइल ?

पुष्कर भुुषाल सञ्चालक रहल पुुष्प लक्ष्मी कन्ट्रक्सन एण्ड सप्लार्यस् मसुरिया अलपत्र पारल दक्षिण टेढीसे बेनौली पेट्रोल पम्मसमके सडक, डम्मारीसे रामपुर सडक, रामपुर सडक, वडा नंं २ ओ वडा नंं १ मे कालोपत्रेके काम करल रहे ।

वडा नंंं. ७ स्थित भुइयाफाँटास्थित २५ लाख ओ डोसर २० लाख बजेट रहल सडक स्तरोन्नतीके काम सुदर्शन ठाकुर सञ्चालक रहल ठाकुर कन्ट्रक्सन काम करल बटागिल बा । उ कन्ट्रक्सन वडा नंं ५ स्थित ५० लाख बजेट रहल गोबरैला सडक खण्ड, ४० लाख बजेट रहल वडा नंं २ ओ वडा नंं ४ मे कालोपत्रेके काम करल पागिल बा ।

ठेकेदार कृष्ण चौधरी वडा नं. ६ ओ ५ मे सडक स्तरोन्नती ओ कालोपत्रेके काम करल रहे । ठेकेदार प्रकाश सापकोटा ३५ लाख बजेट रहल वडा नं. २, ३ ओ ४ जोर्ना सडक निर्माणके काम करल रहे । कलेसे ११ लाख बजेट रहल वडा नंं ४ मे सडक स्तरोन्नती ओ ३० लाख बजेट रहल वडा नं. ९ के कालोपत्रेके काम करल बटागिल बा ।

महेश सापकोटा सञ्चालक रहल दुर्गालक्षमी कन्ट्रक्सन मसुरिया २०/२० लाख बजेट रहल वडा नंं ९ स्थित बनकनरी ओ कोइलही ताल क्षेत्रमे सडक स्तरोन्नतीके काम करल रहे ।

कलेसे प्रेम चौधरी सञ्चालक रहल प्रेम बिल्डर्स सुखड वडा नंं ८ मे ३० लाखमे कालोपत्रेके काम ओ २० लाख बजेट रहल वडा नं. ३ मुडामे सडक स्तरोन्नतीके काम करल रहे ।

विप्लव निर्माण सेवा देवहरियामार्फत ठेकेदार अनिल चौधरी वडा नंं ४ मे सडक स्तरोन्नती ओ वडा नं. ३ निमुवाबोझीमे १५ लाख बजेटमे कालोपत्रेके काम करल गाउँपालिका स्रोत बटाइल ।

ठेकेदारहे नैचिन्ठी : अध्यक्ष चौधरी

कैलारी गाउँपालिकाके अध्यक्ष लाजुराम चौधरी योजनाके स्थिति ओ बजेट अनुसार निर्माणके काम उपभोक्ता समिति या ठेक्कामार्फत निर्माण कम्पनीसे करैटी आइल बटैलै । मने उपभोक्ता समितिके नाममे ठेकेदारसे काम हुइल कना कहाईके औचित्य नैरहल दाबी कर्लै ।

गाउँपालिका उपभोक्ता समिति बाहेक अन्य पक्षहे नैचिन्ह बटैटी योजनाके काम प्रविधिक इस्टीमेट अनुसार हुइना ओ कामप्रतिके जिम्मेवारी ओ दायित्व उपभोक्ता समितिके फेन रहना अध्यक्ष चौधरीके कहाइ बा ।

अधिकांश विकासे योजना उपभोक्ता समितिमार्फत हुइटी आइल बा । मने उ योजनाके लाग पहुँचके आधारमे ओ बन्द कोठाभिट्टर समिति गठन हुइटी आइल स्रोतके दाबी बा ।

  • 164
    Shares

जनाअवजको टिप्पणीहरू