थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४३, शुक्कर ]
[ वि.सं ३० श्रावण २०७७, शुक्रबार ]
[ 14 Aug 2020, Friday ]

बाढसे अपांगताहुकनके व्यवसायमे लाखौके क्षति

पहुरा | १७ श्रावण २०७७, शनिबार
  • 65
  •  
  •  
  •  
  •  
  •  
  •  
  •  
    65
    Shares
बाढसे अपांगताहुकनके व्यवसायमे लाखौके क्षति

पहुरा समाचारदाता
धनगढी, १७ सावन
। यिहे सावन १४ गतेक आइल बाढसे अपांगता रहल व्यक्तीहुकनसे संचालन करल व्यवसायमे पूर्ण रुपसे क्षति पुगैले बा ।

बाढके कारण कैलारी गाउँपालिका–७ बसन्ता, भजनी नगरपालिका–८ मे अपांगता रहल व्यक्तीहुकनससे संचालन करल व्यवसायमे पूर्ण रुपसे क्षति पुगाइल सर्वाङिण अपांगता विकास समाज नेपाल कैलालीके कार्यकारी निर्देशक नन्दराज भट्ट जनैलै ।

कैलालीके भजनी–८ स्थित अपांगताहुकनके कार्यालय भवन तथा ओइनसे सञ्चालन करल साना उद्याेग

कैलारी गाउँपालिका वडा नम्बर ७ बसन्तामे रहल अति अशक्त अपांगता रहल व्यक्तिहुकनके घरेम बाढ पैठके ओइनसे संचालन करल किराना पसलमे रहल करिब १ लाख रुप्या बराबरके सामान पुहाइल उहाँ बटैलै । बाढसे उहे ठाउँक १२ जानेसे ढेर अपांगताहुकनके घरेम आंशिक क्षति पुइल ओ खेतुवा बारीमे लगाइल अन्नबाली भर पूर्ण रूपमे क्षति पुगाइल निर्देशक भट्ट बटैलै ।

ओस्टेक करके कैलालीके भजनी नगरपालिका– ८ मे दृष्टिबिहिन अपांगता रहल व्यक्तिहुक्रे अपने कार्यालय भवनमे संचालन करल चप्पल उद्योगभिटर पानी पैठके लाखौंके क्षति हुइल बा । कलेसे कार्यालयमे रहल आवश्यक महत्वपूर्ण काजजात भिजके काम नइलग्ना हुइल जनागिल बा । उ बाढसे ११ जाने अपांगता रहल व्यक्तिहुकनके सहायक सामग्री पुहाइल सर्वाङिण अपांगता विकास समाज नेपाल कैलालीके कार्यकारी निर्देशक जनैलै ।

उहाँ कहलै,–‘अपांगता रहल व्यक्तीहुक्रे छोटमोट किराना पसल, चटपटे, ठेला गाडा, कृषि तरकारी, साइकल, मोटरसाइकल मर्मत व्यवसाय संचालन करके जिविकोपार्जन करटी रहिट, बाढसे अपांगताहुकनके व्यवसायमे पुर्ण रुपसे क्षति पुगाइलपाछे ओइने अब्बे समस्यामे बाटै ।’

भजनी नगरपालिका, टीकापुर नगरपालिका ओ जानकी गाउँपालिकामे करके १५ जाने अपांगता रहल व्यक्तिहुकनके घरेम बाढ पैठके ढेर क्षति हुइल ओ ५० जाने अपांगता रहल व्यक्ति घरबाँस बिहिन हुके सुरक्षित ठाउँमे बैठना बाध्य हुइल सर्वाङिण अपांगता विकास समाज नेपाल जनैले बा ।

उ बाढसे पीडित हुइल अपांगता रहल व्यक्तिहुकनके तथ्याङक संकलन हुइटी रहल सर्वाङिण अपांगता विकास समाज नेपाल कैलालीके कार्यकारी निर्देशक नन्दराज भट्ट जनैलै । अपांगता रहल व्यक्तिहुकनके स्थानीय समुह ओ सर्वाङिण अपांगता विकास समाज नेपालके प्राविधिक सहयोगमे दिगो विकास समाज भजनीके विषेश टोली परिचालन करके १२० जाने अशक्त बाढसे पीडित रहल व्यक्तिहुकनके समस्या पहिचान तथा क्षतिके सामान्य विवरण प्राप्त करल मने पूर्ण विवरण संकलन कैना कठिनाई रहल उहाँ बटैलै ।

बाढसे प्रभावित अपांगताहुकनके जीवन पुनस्र्थापना कैना दीर्घकालिन सहयोग ओ आयआर्जन तथा सहज आवागमन सामग्रीके आवश्यकता तत्काल रहल ओरसे यकर दीर्घकालीन व्यवस्थापन स्थानीय सरकार ओ प्रदेश सरकारसे करे पर्ना निर्देशक भट्ट बटैलै ।

दिगो विकास समाज भजनी ओ नेपाल रेडक्रस सोसाइटीसे राहत वितरण करटी रहल मने बाढसे डगर विगारल कारण राहत लक्षित वर्गसम पुगैना समस्या हुइल दिगो विकास समाज भजनीके प्रकोप व्यवस्थापन प्रमुख सीताराम चौधरी बटैलै ।

सावन १४ गतेक बाढसे कैलाली जिल्लाके पुर्वी भाग पुरे जलमग्न हुके अभिनफे खेतबारीमे पानी जमल बा । बाढसे ठाउँ–ठाउँमे डगरघाट विगारल कारण राहत वितरणमे फे समस्या डेखल बा । बाढसे कैलारी गाउँपालिकाके पुर्वी क्षेत्र, भजनी नगरपालिका, जानकी गाउँपालिका, जोशीपुर गाउँपालिका ओ टीकापुर नगरपालिकामे ढेर क्षति पुगैले बा कलेसे बाढमे पुहके भजनी नगरपालिका– ८ के तीन जनेक ज्यानफे गैल बा ।

  • 65
    Shares

जनाअवजको टिप्पणीहरू