४ दिनपाछे ३ जाने पक्राउ, कडा कारवाहीके माग

पहुरा समाचारदाता
धनगढी, २९ सावन । कैलालीके टीकापुरसे कान्तिपुर दैनिकमे कार्यरत पत्रकार गणेश चौधरीसहित २ जहन कुटपिट करल घटनामे प्रहरी ३ जहन पक्राउ कर्ले बा ।

घटना घटल ४ दिनपाछे किटानी जाहेरीके आधारमे विफेक् रोज साँझ्याके प्रहरीके टोली ३ जहन पक्राउ करल हो ।

ईलाका प्रहरी कार्यालय टीकापुरके प्रहरी नायव उपरिक्षक मधुसुधन न्यौपानेके अनुसार किटानी जाहेरीके आधारमे जानकी गाउँपालिका ६ जगतपुरके २२ वर्षीय ललित कडायत, २५ वर्षीय शिरिष शाह ओ २२ वर्षीय सुरेन्द्र शाहीहे पक्राउ करगिल हो ।

मने घटनामे ५ जहनके संलग्नता रहल बटागिल रहे । ३ जहन विरुद्ध किल किटानी जाहेरी आइलओरसे ३ जहनके किल पक्राउ करल प्रहरी नायव उपरिक्षक न्यौपाने जानकारी डेलै । उहाँहुकन विरुद्ध ज्यान मार्ने उद्योग अन्तरगत किटानी जाहेरी दर्ता हुइल बा ।

सावन २६ गते साँझ्याके जानकी गाउँपालिका–६ जगतपुरसे रिपोर्टिङ करके घर फर्कन क्रममे पत्रकार चौधरी ओ उहाँक् संग रहल भोजराज चौधरी उप्पर संघातिक आक्रमण हुइल रहे ।

घटनावारे जानकारी करैटी गणेश चौधरी कहलै, ‘सावन २६ गते साँझ्या करिब ८ बजेओहोर घर फर्कटी रही । एक्कासी आक्रमण हुइल । ओकरपाछे स्थानीय भरत शाहके घरमे जाके ज्यान जोगागिल । मै टे हेल्मेट लगैले रहु टे ढिउर चोट लागे नैपाइल मने मोर संग रहल भोजराज चौधरीक् कपारमे चोट लागल बा । उहाँक् कपारमे ३ टाँका लागल बा । मोर फेन अनुहारमे चोट लागल बा ।’

उहाँहुकनसे कौनो वादविवाद ओ समाचार लिखल विषयवस्तु नैरहलेसे अप्नेहुकन कौन कारणसे एकफाले कुटपिट कर्लै कहिके अभिन जाने नैसेकल पत्रकार गणेश चौधरी बटैठै ।

घटना लगत्ते उहाँहुकन उपचारके लाग नेपालगञ्ज लैगिल रहे । उपचारपाछे दुनु जाने सावन २७ गते घर फर्कल रहै । सावन २७ गते पीडित पत्रकार चौधरी ईलाका प्रहरी कार्यालय टीकापुरमे किटानी जाहेरी डेहल रहिट । किटानी जाहेरी परल ३ दिनपाछे प्रहरी उ ३ जहन पक्राउ करल हो ।

जिल्ला प्रहरी कार्यालय कैलालीके प्रहरी प्रमुख तथा प्रहरी उपरिक्षक अनुपम शमशेर राणा घटनावारे अनुसन्धान सुरु करल जानकारी करैटी दोष प्रमाणित हुइलेसे कानून अनुसार कारवाही हुइना बटैलै ।

यहेबीच घटनाके सर्वत्र विरोध हुइल बा । पत्रकार सम्वद्ध संघ संगठन तथा अधिकारवादी संगठन छुट्टाछुट्टे प्रेस विज्ञप्ति जारी करटी घटनाके विरोध जनाइल रहिट । ओ घटनामे संलग्नहुुकन कडा कारवाही तथा पीडितहुकन न्यायके लाग सम्बन्धित निकायसे माग करल रहिट ।

नेपाल पत्रकार महासंघके सुदूरपश्चिम प्रदेश समिति, पत्रकार महासंघके जिल्ला समिति कैलाली, नेपाल आदिवासी जनजाति पत्रकार महासंघ (फोनिज) केन्द्रीय समिति, फोनिज सुदूरपश्चिम समिति, फोनिज कैलाली, थारु पत्रकार संघ (थापस) के केन्द्रीय समिति, थापस कैलाली, थरुहट थारुवान मोर्चालगायत संघ संगठन प्रेस विज्ञप्ति जारी करके घटनाप्रति घोर भत्र्सना करटी उ आपराधिक समूहहे कानून बमोजिम कडा कारवाहीके लाग सम्बन्धित निकायसे जोडदार माग करल रहिट ।