सुदूरपश्चिममे ठप १९ जनहनमे संक्रमण पुष्टि
पहुरा समाचारदाता
धनगढी, ३० सावन । सुदूरपश्चिम प्रदेशमे शुकके १९ जाने कोरोना संक्रमिट ठपल बाटै । देशभर टमान प्रयोगशालामे कैगिल परिक्षणमे १९ जनहनमे कोरोना संक्रमण पुष्टि हुइल हो ।
सेती प्रादेशिक अस्पतालके प्रयोगशालामे कैगिल परिक्षणमे कैलालीके पाँच, अछामके ६ ओ कञ्चनपुरके दुई जनहनमे कोरोना संक्रमण पुष्टि हुइल हो । पाटन स्वास्थ्य विज्ञान प्रतिष्ठानमे कैगिल परिक्षणमे कैलालीके ३ ओ बाजुराके एक जनहनमे कोरोना संक्रमण पुष्टि हुइल बा । स्टार अस्पतालमे कैलालीके एक ओ डडेल्धुरा अस्पतालमे बझाङ वित्थडचिर–६ के एक पुरुषमे कोरोना पुष्टि हुइल बा । १ सय ४१ जनहनमे करल परिक्षणमे १ जनहनमे पोजेटिभ डेखल डडेल्धुरा अस्पताल कोभिड–१९ परिक्षण प्रयोगशालाके इन्चार्ज ईश्वरी प्रसाद भुषाल जनैलै ।
ओस्टेक करके पछिल्का २४ घन्टामे ठप ५९४ जनहनमे कोरोना संक्रमण पुष्टि हुूइल स्वास्थ्य तथा जनसंख्या मन्त्रालय जनैले बा ।
मन्त्रालयसे शुकके आयोजना करल नियमित कोरोना मिडिया ब्रिफिङमे प्रवक्ता डा जागेश्वर गौतम संक्रमितके संख्या २५ हजार ५५१ पुगल जनैलै । ओस्टेक करके पछिल्का २४ घन्टामे कोरोना संक्रमणसे मुक्त हुके घर लौटुइयाके संख्या २४० जाने रहल बटै । यी संगे हालसम ठिक हुइलके संख्या १७ हजार ७७ पुगल बा । मन्त्रालयके अनुसार शुकसम पीसीआर विधिसे ४ लाख ९४ हजार ६१३ परीक्षण करल बा । ओस्टेक करके २४ घन्टामे जम्मा ११ हजार ५ सय ७५ पीसीआर परीक्षण हुइल बा । हालसम क्वारेन्टाइनमे रहल संख्या १४ हजार ६ सय ३८ जाने रहल बाटै ओस्टेक करके आइसोलेसनमे रहल संख्या ७ हजार ९१३ जाने रहल बा ।
ओस्टेक करके नेपालमे कोरोनाभाइरससे ज्यान गैलके संख्या ९९ पुगल बा । पछिल्का २४ घण्टामे ठप ४ जानेक ज्यान गैलपाछे नेपालमे कोरोनासे ज्यान गुमुइयाके संख्या ९९ पुगल हो ।
शुकके नियमित प्रेस ब्रिफिङमे स्वास्थ्य मन्त्रालयके प्रवक्ता डा जागेश्वर गौतम मोरङ ओ सिरहाके १–१ तथा बाराके २ जानेक करके ४ जानेक निधन हुइल बटैलै ।
हालसम ज्यान गुमुइयाके संख्या प्रदेश नम्बर १ मे ९ जाने पुरुष, प्रदेश नम्बर २ मे ३१ पुरुष ११ महिला करके ४४ जाने, बागमती प्रदेशमे १३ पुरुष ५ महिला करके १८ जाने, गण्डाकी प्रदेशमे ६ पुरुष, प्रदेश नम्बर ५ मे ६ पुरुष, कर्णाली प्रदेशमे ४ पुरुष ओ सुदूरपश्चिम प्रदेशमे ५ पुरुष, ३ महिला करके ८ जाने ओ सक्कु मिलाके ९९ जाने ज्यान गुमैले बाटै । जेम्ने ७७ पुरुष ओ २२ महिला रहल बाटै ।
