ज्येष्ठ नागरिकहे मोबाइल ओ सीम

पहुरा समाचारदाता
धनगढी, २२ फागुन । कैलालीके एक वडा कार्यालयसे वडामे रहल सक्कु ज्येष्ठ नागरिकहे मोबाइल ओ नेपाल टेलिकमके सीमकार्ड वितरण करले बा ।
लक्षित समुदायहे सम्मान कार्यक्रम अन्तर्गत कैलारी गाउँपालिकाके वडा नम्बर ७ के कार्यालयसे वडाभरिक ज्येष्ठ नागरिकहे मोबाइल वितरण करल हो । वडा कार्यालयसे वडाके सक्कु एकल महिला ओ अपाङ्ता रहल व्यक्तिहे फेन मोबाइल वितरण करले बा ।
लक्षित समुदायके व्यक्ति ओ स्थानीय सरकारबीच नियमित खबर आदानप्रदान कैना उद्देश्यसे मोबाइल वितरण करल जनाइल बा । बिफेक रोज वडा कार्यालयमे आयोजित एक कार्यक्रमके बीच गाउँपालिकाके अध्यक्ष लाजुराम चौधरी ओ नेपाल टेलिकम धनगढीके प्रमुख सुरत मल्ल लक्षित समुदायके व्यक्तिहे मोबाइल हस्तान्तरण करलै ।
वडा कार्यालयसे चालू आर्थिक बरसमे लक्षित समुदायके कार्यक्रम अन्तर्गत सम्मानके लाग चार लाख ८५ हजार रुपैयाँ बजेट विनियोजन करल रहे । उ बजेटसे मोबाइल खरिद कैके ३७६ जनहनहे वितरण करल वडा कार्यालय जानकारी डेले बा । २९ जनहनहे आभिन फेन मोबाइल अपुग रहल जनाइल बा ।
उ अवसरमे गाउँपालिकाके अध्यक्ष चौधरी चालू आर्थिक बरसमे करल नीतिगत निर्णय अनुसार सक्कुु वडाके ज्येष्ठ नागरिकहे सम्मान करल बटैलै । उहाँ वडा नम्बर ७ मे भर मोबाइल वितरण करल जनैटी कहलै– ‘लक्षित वर्गके सामाजिक सुरक्षा भत्ता उहाँहुक्रे बैंक खातामे जम्मा होसकल खबर आब मोबाइलमे अइना बा ।’लक्षित समूहसे प्राप्त कैना भत्ता दुरुपयोग नाइ होए कहिके सक्कु जनहनके भत्ता रकम बैंकमे जम्मा कैना व्यवस्था करल बा । आब उहाँहुक्रनके खातामे पैसा जम्मा हुइल खबर मोबाइलमे अइना अध्यक्ष चौधरी जानकारी डेलै । मोबाइल वितरणसे लक्षित वर्ग ओ स्थानीय सरकारबीच नियमित खबर आदान प्रदानमे सहयोग पुग्ना उहाँके कहाइ रहे । ‘घरमे कोइ गालीगलौच वा अवहेलना करलमे आब उहाँहुक्रे सिधे जनप्रतिनिधिहे फोन कैके आपन समस्या राखे सेकही,’ उहाँ कहलै– ‘यिहीसे हमार बीच नियमित सञ्चार हुइटी रहलना हम्रे अपेक्षा करले बाटी ।’
ओस्टके, लक्षित समूहके लाग गाउँपालिकामे आइल टमान कार्यक्रमके बारेम फेन मोबाइलमे जानकारी करैना जनाइल बा । सक्कुु जनहनके मोबाइलमे एकसाथ एसएमएस पठैना व्यवस्था फेन करल जनाइल बा ।
प्रविधिके जमानामे वडा कार्यालयसे एक उदाहरणीय कार्य करल नेपाल टेलिकम धनगढीके प्रमुख मल्ल बटैलै । ‘अब्बे प्रविधिके युग हो ओ मोबाइल सक्कु जनहनहे अति आवश्यक होसेकल बा,’ उहाँ कहलै, ‘वडा कार्यालयके यी मेरके प्रयास मुलुकमे एक उदाहरणीय कार्य हो ।’
वडा नम्बर ७ मे रहल ज्येष्ठ नागरिक, अपाङ्ता रहल व्यक्ति ओ एकल महिला सहित ४०५ जनहनहे मोबाइल ओ नेपाल टेलिकमके सीमकार्ड वितरण करजैना वडा अध्यक्ष कमलप्रसाद चौधरी बटैलै । ३७६ जनहनहे बिफके रोज मोबाइल ओ सीमकार्ड डेहल उल्लेख करटी उहाँ कहलै बाँकी २९ जहनहे अपाङ्ता रहल व्यक्तिहे पाछे मोबाइल डेना बटैलै ।
‘ज्येष्ठ नागरिकहे आपन समस्या, गुनासो स्थानीय सरकार समक्ष राख्न सहज होए कहिके मोबाइल ओ सीमकार्ड वितरण करल हो,’ उहाँ कहलै, ‘प्रविधिके जमानामे युवाहे किल नाइहोके, ज्येष्ठ नागरिकहे फेन मोबाइल आवश्यक बा ।’
नेकपाके चन्द्रिका प्रसाद चौधरी, वडा सदस्य फिरुराम चौधरी मन्तव्य राखल कार्यक्रममे नेपाल टेलिकमके चन्द्र चौधरी, वडा सदस्य, वडा कार्यालयके कर्मचारी, टमान गाउँके भलमन्सा लगायतके उपस्थिति रहल रहे ।
मोबाइल पाइलपाछे ज्येष्ठ नागरिक, एकल महिला ओ अपाङ्ता रहल व्यक्ति खुशी हुइल बाटै । उहाँहुक्रे स्थानीय सरकार, परिवार, आफन्तसे बात कैना सहज किल नाइहोके गीत संगीत सुनक लाग फेन मोबाइल उपयोगी हुइना बटैले बाटै ।