महिलाहे आर्थिक रुपमे आत्मनिर्भर बनाबः वडाध्यक्ष चौधरी
पहुरा समाचारदाता
धनगढी, २३ फागुन । कैलारी गाउँपालिका वडा नम्बर ७ के वडाध्यक्ष कमलप्रसाद चौधरी टमान सीपमूलक तालिम मार्फत महिलाहुक्रनहे आर्थिक रुपमे सम्बृद्ध बनैटी आत्मनिर्भर बनैना बटैले बाटै ।
बिफेक रोज २९० घण्टे हाते होजियारी तालिमके उद्घाटन करटी वडा अध्यक्ष चौधरी वडा अन्तर्गतके महिलाहुक्रनहे सीपमूलक तालिम मार्फत आर्थिक, सामाजिक रुपमे आत्मनिर्भर बनैना बटाइल हुइट ।
वडा कार्यालयके २ लाख ४८ हजार पाँचसय रुप्या आर्थिक सहयोग तथा उज्यालो भविष्य यूवा समाज धनगढीके आयोजनामे तालिम सञ्चालन हुइल बा ।
कार्यक्रममे वडा सदस्य फिरुराम चौधरी, मुसम्पी चौधरी, विष्णा सुनार, सुन्दर प्रसाद चौधरी, वडा सचिव गणेश चौधरी, होजियारी तालिमके प्रशिक्षक टुलियादेवी चौधरी लगायतके उपस्थिति रहल रहे ।
कार्यक्रमके सञ्चालन उज्यालो भविष्य यूवा समाजके कार्यक्रम संयोजक गुनसिंह चौधरी करल रहिट ।
