जंगरार यूवाके आवश्यकता बाः मन्त्री शाह

पहुरा समाचारदाता
धनगढी, २५ फागुन । सुदूरपश्चिम प्रदेशके आन्तरिक मामिला तथा कानून मन्त्री प्रकाशबहादुर शाह मुलक निर्माणमे जंगरार ओ हिमाहिलो यूवाके आवश्यकता रहल बटैले बाटै ।
शनिच्चरके रोज धनगढीमे ‘स्वेच्छिक राष्ट्रिय समिक्षा प्रक्रिया ओ यूवा’ विषयक अन्तरक्रिया कार्यक्रममे उहाँ देशहे समृद्ध बनाइक लाग कर्मशिल यूवाके आवश्यकता रहल बटैले रहिट । उहाँ कहलै, अमेरिका, जापान कर्मशिल यूवाके बनाइल देश हो, सुदूरपश्चिम प्रदेशमे टमान सम्भावना बा, यहाँफे यूवा सक्रियाहुके लग्लेसे समृद्ध प्रदेश बनाई सेक्जाई ।
कोरोना भाइरससे विश्व भयवाह अवस्थामे बा, नेपालमे कोरोना नइआइल हो ओटरा ढेर डरैना अवस्था नइहो, मने सर्तकता अपनैना जरुरी बा मन्त्री शाह कहलै । यहाँ सचेतनाफे भ्रम ढेर फैजाजैटी, खाना, सरसफाईमे ध्यान डेना जरुरी बा ।
सुदूरपश्चिम प्रदेशके विद्यायन तथा मामिला समितिके सभापति नेपालु चौधरी प्रदेश सरकार कृषिमे यूवा लक्षित ढेर बजेट विनियोजन करल बटैलै । उहाँ कहलै, यहाँ छोट–छोट काम करेबेर यूवाहुक्रे लाज मन्ना मने विदेश जाके उहे काम सहजुले कैना प्रविति बा, काम कैना यूवा विदेश पलायन हुइल कारण यहाँक भूमिक मरुभूमि परटीमे परिणत हुइटी गैल बा ।
सुदूरपश्चिम प्रदेश ३४ ठो विद्येयक पारिक करल जनैटी, प्रदेश लोकसेवा विद्येयकसे यहाँक ढेर यूवा रोजगारी पैना उहाँ कहलै । सुशासन विद्येयक समेट पारित हुसेकल ओरसे यहाँक हरेक गतिविधिके यूवाहुक्रे निगरानी करे सेक्ना सभापति चौधरी बटैलै ।
प्रदेशसभा सदस्य दुर्गा विक यूवाहुकनहे प्रदेश सरकार बल्गर खम्बाके रुपमे लेहल बटैलै । कार्यक्रम कटरा करली कनासेफे परिणाम ओ परिवर्तन हेर्ना जरुरी रहल उहाँ कहली । यूवा परिचालन करके दिगो विकास लक्ष्यमे पुगे सेक्ना प्रदेशसभा सदस्य विक कहली ।
कार्यक्रममे आरडीआरसीके कार्यक्रम संयोजक ठाकुर प्रसाद करियाप्रधान धनगढी उपमहानगरपालिका ओ कैलारी गाउँपालिकामे संचालन हुइल परियोजनाके जानकारी सूचना प्रविधिके माध्यमसे लेहे सेक्ना जनैलै । धनगढी ओ कैलारीमे डाटा पोर्टल जडान हुइल ओरसे सक्कु जानकारी लेहे सेक्ना उहाँ बटैलै ।
ओस्टेक धनगढी उपमहानगरपालिकाके आइटी अफिसर सुयस चन्द धनगढी उपमहानगरपालिकामे संचालन कैगिल योजना डाटा पोर्टलमे अपलोड हुइल जनैलै । उहाँ कहलै, परियोजनाके बजेट, सम्झौता मिति, काम सेक्ना मिति उपभोक्ता समितिके पदाधिकारी नाम ओ सम्पर्क नम्बर समेट रहल ओरसे यूवाहुक्रे निगरानी करे सेक्ना बटैलै ।
कार्यक्रम यूथ एडभोकेसी नेपालके महासचिव गीता चौधरीके अध्यक्षतामे हुइल रहे । कलेसे संचालन प्रेम ढुगाना करले रहिट । अन्तरक्रिया कार्यक्रम विद्यार्थी तथा यूवाहुकनके सहभागिता रहल रहे ।