छोटेलाल बहादुरके भैसाहे उठाके लैगिल बघुवा

कैलाली, २१ बैशाख । लोटौहुवा सामुदायिक वनुवासे आइल बर्का बघुवा मोहनपुर गाउँक स्थानीय छोटेलाल बहादुर चौधरीके एक भैंसाहे बोकके लैगिल बा ।
कैलारी गाउँपालिका वडा नं. ७ स्थित लोटौहुवा सामुदायिक वनुवा लग्गे रहल फँटुवामे चह्रटी रहल भैसाहे दिनके १ बजे ओर बघुवा बोक्के लैगिल स्थानीय बिक्रम चौधरी जानकारी डेलै । नेपाल भारत सीमाके दुधुवा नेशनलपार्कके करिब ४० मिटर भिट्टर भैँसाहे बोकके लैगिल जनाइल बा ।
उ समुदायिक बनुवा भारतके दुधुवा नेशनलपार्कसे जोँटल बा । जौन ओरसे समय समयमे उ बनुवामे टमान मेरिक वन्यजन्तु डेखजैनाके साथे गाउँघर पैँठके क्षति पुगैना करल बाटै । दिनदहारे गाउँघरमे बाघभालु पैँठ्ना हुइल ओरसे स्थानीयमे त्रास बह्रल बा ।
कौनो दिन बघुवा गाउँमे पेलके ढिउर क्षति करे सेक्ना कहटी स्थानीयहे सर्तकता अपनाइ कहल बा ।