थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १७ अगहन २६४६, शनिच्चर ]
[ वि.सं १७ मंसिर २०७९, शनिबार ]
[ 03 Dec 2022, Saturday ]

नेपालीहुकन रातारात पठाई लागल भारत, सरकार बेखबर

पहुरा | ३० बैशाख २०७७, मंगलवार
नेपालीहुकन रातारात पठाई लागल भारत, सरकार बेखबर

धनगढी, ३० बैशाख । भारतके टमान ठाउँमे रहल नेपालीहुकन भारत सरकार रातारात पठाई लागल बा ।

कोरोना भाइरस (कोभिड १९) के महामारीके कारण भारतमे जारी लकडाउनपपाछे टमान क्वारेन्टाइनमे महिनौं दिनसम बैठल नेपालीहुकन फर्काइ लागल हो ।

यहेबीच भारतके उत्तर प्रदेशके मुख्यमन्त्री योगी आदित्यनाथ घर फर्कन चाहना नेपालीहुकनके लाग आवश्यक प्रबन्ध मिलाइक लाग निर्देशन समेत डेले बाटै । मुख्यमन्त्री योगी सोम्मारके रोज ट्वीट करटी घर फर्कन चाहना नेपालीहुकन आवश्यक प्रबन्ध मिलाइक लाग निर्देशन डेले बाटै । उहाँ नेपाल–भारत सीमासम पुगाइक लाग व्यवस्था मिलाइक लाग राज्यके अधिकारीहुुकन निर्देशन डेले बाटै । साथे उहाँ उत्तर प्रदेशमे बैठे चाहना नेपालीहुकनके लाग फेन आवश्यक प्रबन्ध मिलाइक लाग स्थानीय अधिकारीहुकन निर्देशन डेले बाटै ।

उत्तर प्रदेशके पलियामे किल ५० दिनसे ३ सयसे ढिउर नेपालीहुकन क्वारेन्टाइनमे राखगिल बा । कलेसे संयौं नेपाली भारतके खटिमामे राखगिल बा ।

यहेबीच सोम्मारके रोज रातके कञ्चनपुरके ब्रह्मदेव लग्गे भारतके उत्तराखण्डके टनकपुरस्थित क्वारेन्टाइनमे रहल १६७ नेपालीहुकन दशगजामे नानके छोरगिल बा । भारतसे दशगजामे छोरलपाछे नेपाल प्रवेश करैना निर्देशन नैपाइल नेपाली प्रहरी प्रशासन रातारात उहाँहुकन भित्र्याइल हो ।

उहाँहुकन हाल महेन्द्रनगरस्थित वैजनाथ माविके क्वारेन्टाइनमे राखगिल बा । सशस्त्र प्रहरीके झलारीस्थित ३५ नं. गणके एसपी वीरसिंह साहु ४५ दिन क्वारेन्टाइनमे बैठ्लेसे फेन रातके दशगजामे छोरलपाछे अप्नेहुक्रे यहाँके क्वारेन्टाइनमे राखल जानकारी डेलै । उहाँके अनुसार भारत नेपालीहुकन दिनहुँ दशगजामे नानके छोरटी आइल बा ।

भारतसे नेपालीहकर्न फर्काइ लग्नेसे फेन नेपाल सरकार भर अभिनसम प्रवेश करैनाओहोर चासो नैडेले हो । जिल्ला प्रशासन कार्यालय कञ्चनपुर केन्द्रसे आदेश नैआइल कहटी भारतीय क्षेत्रमे रहल नेपालीहुकन भित्र्याई नैमानलपाछे भारतीय पक्षहुक्रे समन्वयबिना एकतर्फी रुपमे दशगजामे नानके छोरटी आइल हुइट । कुछ दिन टे नाकामे आइल नेपानीहुकन समेत भारत ओहोर फिर्ता पठागिल रहे । अट्वारके रोज रातके फेन ७५ नेपालीहुकन भारतीय पक्ष ब्रह्मदेवमे नानके छोरल रहे । उहाँहुकन फेन सशस्त्र प्रहरी क्वारेन्टाइनमे राखके आरडीटी परीक्षण करल रहे । कुछ जहन सम्बन्धित स्थानीय तहमे पठागिल बा ।

कञ्चनपुरके ब्रह्मदेवमे छाेरल नेपाली

ओस्टके, कैलालीके प्रमुख जिल्ला अधिकारी यज्ञराज बोहरा यी मामिला दुई सरकारबीचके रहल ओ जे जहाँ बा, ओहै बैठ्ना व्यवस्था मिलैना सहमति अनुसार भारतमे रहल नेपानी भारतमे ओ नेपालमे रहल भारतीय नेपालमे राख्न व्यवस्था करल बटैलै । मने फर्कैना वा भित्र्याइनाबारे अभिनसम कौनो निर्देशन नैआइल प्रजिअ बोहराके कहाइ बा ।

जनाअवजको टिप्पणीहरू