सामाजिक दूरी कायम कैटी गाउँपालिकामे दादुरा रुबेला खोप सञ्चालन

हसुलिया, २ जेठ । कैलालीके कैलारी गाउँपालिकामे दादुरा रुबेलाके खोप सञ्चालन करल बा ।

गाउँपालिकामे रहल बालबालिकाहे जेठ १ गतेसे दादुरा रुबेलाके खोप डेहे लागल हो । यिहीसे आघे, चैत १५ गतेसे सञ्चालन हुइना उ खोप कार्यक्रम कोरोना भाइरसके कारण स्थगित करल रहे ।

गाउँपालिकामे रहल ६ ठो स्वास्थ्य संस्थासे नौ महिनासे पाँच बरससमके बालबालिकाहे दादुरा रुबेलाके खोप डेटी रहल गाउँपालिकाके स्वास्थ्य शाखा प्रमुख विरेन्द्र सापकोटा जानकारी डेलै । ओस्टके, जन्मलसे पाँच बरससमके बालबालिकाहे पोलियो थोपा फेन खवाइटी रहल बा ।

दादुराके खोप डेना कार्यक्रम जेठ ४ गतेसम सञ्चालन हुइना जनाइल बा । स्वास्थ्यकर्मी सामाजिक दूरी कायम कैके खोप डेना कार्य करटी रहल सापकोटा जनैलै ।
बालबालिकाहे डेहक लाग लागि हसुलिया स्वास्थ्य चौकीमे मेनुका चौधरी, भागरथी पनेरु, पवेरा स्वास्थ्य चौकीमे पार्वती चौधरी, नत्थु चौधरी, रतनपुर स्वास्थ्य चौकीमे सञ्जिव गुरुङ ओ बजारी चौधरी खटल बाटै । ओस्टके, बसौटी स्वास्थ्य चौकीमे बालीचरण कठरिया, पुष्पा भट्ट, गदरिया स्वास्थ्य चौकीमे वीरबहादुर चौधरी, सरिता चौधरी ओ उदासीपुर प्राथमिक स्वास्थ्य केन्द्रमे सञ्जय महतो ओ सुनिता चौधरी खटल जनाइल बा ।

१२ जने स्वास्थ्यकर्मीसंगे खोप कार्यक्रमके लाग औरे सहयोगी स्टापहे फेन खटाइल स्वास्थ्य शाखा प्रमुख सापकोटा बटैलै ।