एक रुपैया संकलन कैके मुख्यमन्त्रीहे ४७८ रुपैँया

पहुरा समाचारदाता
धनगढी, २१ असार । सुदूरपश्चिम प्रदेशके सांसदके भरणपोषणके लाग संकलन करल रकम हुलाक मार्फत बुझाईल बा ।
कोरोना महामारीके बेला प्रदेश सरकारसे सांसदहुक्रनके सेवासुविधा बृद्धि करलपाछे खबरदारीके लाग युवा समूहसे एक रुपैँया अभियान सञ्चालन कैके संकलन हुइल रकम हुलाक मार्फत मुख्यमन्त्री कार्यालयहे बुझाईल हो ।
प्रदेश सरकारसे जनप्रतिनिधिहुक्रनके सेवा सुविधा बृद्धि कैके आम नागरिकके ढाड सेक्न काम करे लागलपाछे युवाहुक्रनके समुहसे विरोध स्वरुप एक रुपैया संकलन अभियान चलाइल रहे । उ अभियानसे संकलित चार सय ७८ रुपैँया मुख्यमन्त्री कार्यालयहे बुझाईल युवा समूहके संयोजक सुरेन्द्र शाह बटैलै ।