थारु म्युजिक भिडियोके धमाधम छायांकन

पहुरा समाचारदाता
धनगढी, २९ असार । देशमा हुइल लकडाउन खोँखर हुइलपाछे थारु म्युजिक भिडियो धमाधम छायांकन हुइटी रहल बा ।

कोरोना भाइरस (कोभिड १९) प्रभावितसे बने पुगल कुछ दिन यहोर लकडाउन खोँखर हुइलपाछे छायांकन हुइटी रहल हो । कुछ दिन आघे किm थारु गायिका अनु चौधरी ओ के थारुके सुमुधुर आवाज रहल थारु गीत ‘डौना बेबरिया’ के म्युजिक भिडियोके छायांकन ओराइल बा ।

सीएस फिल्मस् प्रालिसे रिलिज हुइना म्युजिक भिडियोमे सरद चौधरी ओ सविता दहितके मुख्य भूमिका रहल बा । निर्देशक सुधराम दहितके निर्देशनमे छायांकन हुइल भिडियोके छायांकनकार सतिश कुमार सिन्हा रहल बाटै । छायांकन ओराइल संगे भिडियो हाली बजारमे अइना जनाइल बा । यकर सागे सीएस फिल्मस् प्रालिके निर्माण थारु म्युजिक भिडियो ‘खोजटुुँ मै बसेरा’ फेन हाली बजारमे अइना हुइल बा । म्युजिक भिडियोमे संगत चौधरी ओ सामु चौधरीके बेजोड प्रस्तुति रहल बा ।

सुलभ फिल्मस् एण्ड स्टुडियोके प्रस्तुतिमे निर्मित ‘घोडाघोडी मन्दिरमा’ कना म्युजिक भिडियो फेन सावन १ गते बजारमे अइना निर्माण पक्ष जनैले बा । म्युजिक भिडियोमे छल्लु दादा, सुमित्रा चौधरी लगायतके कलाकार रहल बाटै ।

यकर साथे शनिच्चरसे छायांकन सुरु हुइटी रहल थारु म्युजिक भिडियो ‘दिवाना होगिनु’ फेन हाली बजारमे अइना सुलभ फिल्मस् एण्ड स्टुडियोके दयाशंकर चौधरी बटैलै । म्युजिक भिडियोमे धनीराम चौधरी ओ मनिषा रावल लगायतके कलाकार रहल बाटै ।