तत्काल विद्यालय नइखुल्ना

पहुरा समाचारदाता
हसलिया, १ भदौ । कैलालीके कैलारी गाउँपालिका विद्यालय सञ्चालनके लाग ‘कोभिड–१९ रोकथाम तथा नियन्त्रणमे विद्यालय संचालन निर्देशिका २०७७’ तयार करले बा ।

कोरोना भाइरस (कोभिड–१९) संक्रमण दर कबु बढना, कबु घटना हुइल कारण तत्काल विद्यालय संचालन करे नइसेक्ना अवस्था आइल मने विद्यालय संचालन निर्देशिका तयार करल गाउँपालिका अध्यक्ष लाजुराम चौधरी बटैलै । गाउँपालिका भदौ १ गतेसे विद्यालय संचालनके तयारीमे जुटल रहे ।

‘कोभिड–१९ रोकथाम तथा नियन्त्रणमे विद्यालय संचालन निर्देशिका २०७७’ तयार करसेक्ले बाटी,’ गाउँपालिका अध्यक्ष चौधरी कहलै, निर्देशिक कार्यपालिकासे पास हुइटीकी विद्यालय संचालनके लाग प्रक्रिया आघे बह्राब ।’ गाउँपालिकामे सरकारी भवन नइरहल कारण विद्यालयमे क्वारेन्टाइन ओ आइसोलेशन बनाइ पर्ना अवस्था आइल उहाँ कहलै । विद्यालयहे क्वारेन्टाइन ओ आइसोलेशन बनाइल कारण अभिभावकमे परल नइमजा मनोविज्ञान चिरजैना ओ प्रतिक्रिया लेना काम हुइल अध्यक्ष बटैलै । निर्देशिकामे विद्यार्थीन कटरा दुरीमे धारके पह्रैना, कौन समयमे पह्रैना, कैसिन–कैसिन विधि अपनैना, मास्क, सेनिटाजरके व्यवस्था लगायत टमान विषयबस्तु जोरल उहाँ कहलै ।

उहाँ कहलै, ‘विद्यालयमे बनाइल क्वारेन्टाइन ओ आइसोलेशन करिब खाली हुसेकल बा, जौन विद्यालयहे प्रयोग करल रहे, उहाँक चर्पीहे सेफटी ट्यांकीसे सरसफाई कैना, विद्यालयमे सेनिटाइजर छिटना, विद्यालयमे पूर्ण रुपमे सरसफाई करके रंगरोगन कैना काम जारी बा ।’

गाउँपालिका भदौ १ गतेसे विद्यालय संचालनके लाग कहल रहे, मने अब्बे पूर्वतयारी केल करले बा, कोरोना संक्रमणदर स्थिर नइहुइल कारण विद्यार्थी ओ शिक्षकमे संक्रमण फैल्लेसे फेरसे विद्यालय बन्द कैना अवस्था आइसेक्ना उहाँ कहलै ।

कैलारी गाउँपालिकाके १९ ठो विद्यालयमे क्वारेन्टाइन ओ आइसोलेशन बनाइल रहे, अब्बे करिब सक्कु विद्यालयसे क्वारेन्टाइन हटाके वडा नम्बर ५ बैजपुरस्थित सर्वोदय आधारभूत विद्यालयके भवनमे केल सीमिति राखल अध्यक्ष चौधरी बटैलै । सर्वोदय आधारभूत विद्यालय दुसर विद्यालयमे मर्ज हुइलक ओरसे ओकर भवन प्रयोग करल उहाँ कहलै ।

आबसे विद्यालयमे क्वारेन्टाइन ओ आइसोलेशनके लाग प्रयोग नइकैना कहटी अब्बे गाउँपालिकाभिटर रहल सम्बन्धित वडाके सामुदायिक भवन, सामुदायिक वन उपभोक्ता समितिके भवन, क्लव घरमे क्वारेन्टाइन बनैना पत्र पठाइल अध्यक्ष बटैलै । शिक्षा मन्त्रालयसे सावन २४ गतेसे विद्यालयमे बनाइल क्वारेन्टाइन ओ आइसोलेशन हटाके भदौ १ गतेसे भर्ना सुरु कैना निर्देशन डेले रहे । मन्त्रालय जनस्वास्थ्यके मापदण्ड ओ सुरक्षा मापदण्ड पालना करटी शैक्षिक गतिविधि संचालन कैना आग्रह कैगिल रहे ।

कैलारी गाउँपालिकाके शिक्षा शाखा प्रमुख गणेश मिश्र मुलुकमे कोरोना भाइरस साम्य नइहुके जोखिम ढेर रहल कारण संघीय शिक्षा मन्त्रालयसे सूचना जारी नइकरटसम विद्यालय संचालन करे नइसेक्ना बटैलै । विद्यालय संचालनके लाग सावन महिनामे विद्यालयके प्रअ, विद्यालय व्यवस्थापन समितिबीच छलफल भर करल ओ विद्यालयसे कार्ययोजना बनाके पठाइल उहाँ बटैलै ।

कैलारीमे अब्बे ४६ जाने क्वारेन्टाइनमे रहल बाटै कलेसे दुई जाने सक्रिय कोरोना संक्रमिट रहल गाउँपालिका जनैले बा ।