प्रदेश सांसद चौधरीके पहलमे किसानहुकनहे बोरिङ ओ मोटर वितरण
पहुरा समाचारदाता
धनगढी, ३ भदौ । सुदूरपश्चिम प्रदेशसभा सांसद चुनकुमारी चौधरीके पहलमे कैलालीके गोदावरी नगरपालिकाके किसानहुकनहे सिंचाईके लाग अति आवश्यक बोरिङ ओ पानीमोटर वितरण करल बा ।
सांसद चौधरीसे कृषि ज्ञान केन्द्र कञ्चनपुरसे प्राप्त हुूइल बोरिङ पप्पसेट ओ पानीमोटर आज एक कार्यक्रमके बिच गोदावरी ६ ओ ७ के कृषक समूहहे हस्तान्तरण करल हुइट । ६ ओ ७ मे रहल दुई वडाके ६ समूहहे बोरिङ ओ मोटर हस्तान्तर करल रहे ।
गोदावरी ६ मे रहल हिमशिखर कृषक समूह ओ हरियाली कृषक समूहहे पानीमोटर बितरण करल हो कलेसे वडा नं ६ मे रहल रामजानकी कृषक समूह, आत्मजागरण कृषक समूह, वडा नं ७ मे रहल भगवती कृषक समूह, सिर्जनशिल आइपिएम कृषक समूह ओ परिश्रमी कृषक समूहहे बोरिङ बितरण करल हो ।
कार्यक्रममे बोल्टी सांसद चौधरी यहाँके किसान बलगर नइहुइटसम सुदूरपश्चिम प्रदेश बल्गर हृई नइसेक्ना बटैली । उहाँ नेपालहे कृषि प्रदान देश कना करल हुइलेसेफे बर्सेनि करोडौके खाध्यान्न बाह्य देशसे नाने पर्ना अबस्था रहल बटैली । उहाँ यकर लाग किसान सक्कु बाटमे बलगर हुइूलेसे केल मजा उत्पादन हुइना बाहेरसे खाध्यान्न नाने नइपर्ना बटैली ।
‘अब्बे कैलाली ओ कञ्चनपुरमे उत्पादन हुइल खाध्यान्न पहाडी जिल्लामेफे पुग्न करल बा ।, पहाडमे धान गोहुँके उत्पादन खासे नइहुइठ जिहीसे बर्षेनी खाध्यान्न अभाव हुइटी आइल बा उहाँ कहली । यकर लाग कैलाली कञ्चनपुरके किसानहे मजा अन्नबाली उत्पादन करेक लाग उहे अनुसार उपकरण आवश्यक परठ । उहाँ यरक लाग किसानहे आवश्यक पर्ना सामाग्री डेनामे सरकार पाछे नइहटना बटैली । उहाँ कुछ दिन पहिले वडा नं ८ के कृषक समूहहेफे बोरिङ ओ पानीमोटर वितरण करल बटैली ।
अइना दिनमेफे किसानके लाग अपन ओ प्रदेश सरकारके ओरसे करे सेक्ना सहयोग कैना अपने तयार रहल उहाँ बटैली । सिचाईके लाग अतिआवश्यक रहल बोरिङ ओ पानीमोटरके लाग पहल करके अपनेहुक्रे प्रदान करल कहटी कृषक समूहसे सांसद चौधरीहे धन्यवाद डेहल रहिट ।
