‘दिलमे टोहार नाउँ…’ मे महिमा ओ रमेश

पहुरा समाचारदाता
धनगढी, १९ कुवाँर । थारु फिल्मी इन्डष्ट्रिमे एकसे एक थारु सलिमा, म्युजिक भिडियो निर्माण हुइटी रहल बा ।

अँठ्वार पिच्छे दुई तीनठो म्युजिक भिडियो टमान अफिसियल युट्यूूब च्यानलसे बजारमे अइटी रहल बा । अँठ्वारमे चारपाँचठो म्युजिक भिडियो छायांकन हुइटी रहल बावै । यिहे क्रममे विन्दास मिडियासे लावा म्युजिक भिडियो लन्ना तयारीमे रहल बा ।

थारु म्युजिक भिडियो ‘दिलमे टोहार नाउँ…’ कना बोलके गीतमे छायांकन ओरासेकल भिडियो कार्तिक १ गते सार्वजनिक कैना तयारीमे निर्माण पक्ष जुटल बा । म्युजिक भिडियोमे चर्चित मोडल महिमा कुश्मी ओ रमेश चौधरीके अभिनय रहल बा ।

विनोद चौधरी (मस्तैला) के शब्द संगीत रहल गीतमे सोनु कुश्मी ओ गणेश चौधरीके स्वर रहल बा । आर्दश महतोके डाइरेक्सन रहल भिडियाके छायांकन साहिल चौधरी करले बाटै । भिडियो नेपालके धार्मिक तथा पर्यटकीय क्षेत्र लुम्बिनी, दाङ, सल्यान, रुकुम लगायत क्षेत्रमे छायांकन करल बा ।