निःशुल्क पैना औषधिफे पैसा टिरना बाध्यता
पहुरा समाचारदाता
धनगढी, १९ कुवाँर । स्वास्थ्य अधिकारके अवस्था ओ सरोकारवालाहुकनके भुमिका विषयक अन्तरक्रिया कार्यक्रम सोम्मारके रोज कञ्चनपुरके पुनर्वासमे हुूइल बा ।
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीके आयोजना ओ मानवअधिकार समुहके सहकार्यमे (इएलपी) परियोजना सहयोगमे छलफल हुइल रहे । कार्यक्रममे पुनर्वास नगरपालिका—६ सराशन स्वास्थ्य चौकीके इन्चार्ज तेजप्रकाश जोशी दैनिक ४०/५० जानेसम सेवाग्राही सेवा लेहे अइलेसेफे नगरपालिकासे निःशुल्क उपलब्ध करैना ४५ प्रकारके औषधी कबुफे स्वासथ्य चौकीमे नइहुइना सेवाग्राहीहुक्रे किनके औषधी लेहे पर्ना बाध्यता रहल बटैलै । उहाँ स्वासथ्यचौकीमे खानेपानी, बैठना ठाउँके अभाव ओ खोप केन्द्रके समस्या रहल बटैले ।
पुनर्वास नगरपालिका—५ के वडाअध्यक्ष बिरबहादुर बोगटी कोभिड—१९के महामारीमे आइल टमान समस्या समाधानके लाग सामुहिक रुपमे छलफल करके जाई पर्ना स्थितिमे नगरप्रमुखके कार्यव्यस्तासे कार्यपालिकाके बैठक बैठे नइसेक्के नागरिकहुक्रे समस्या भोगे पर्ना अवस्था सृजना हुइल बटैलै ।
पुनर्वास नगरपालिका—६ के वडाअध्यक्ष मानबहादुर गुरुङ नगरपालिकासे स्वास्थ्यके लाग छ्ुट्याइल बजेटसे समयमे औषधी खरिद करे नाइसेकल बटैटी नगरपालिकासे अपन नीति तथा कार्यक्रम कार्यान्वयन करे नाइसेक्के नागरिकहुक्रे स्वासथ्य अधिकारसे बञ्चित हुई परल बटैलै ।
महिला स्वास्थ्य स्वयंसेविका गंगा रोकाया स्वास्थ्य चौकीसे उपलब्ध करैना औषधीके अभाव हुके कुपोषणके समस्या, गर्भवतीहे डेना आइरन चक्की ओ ५ वरस टरेक नवजातशिशुहुकनहे खोपके समस्या रहल बटैली ।
महिला स्वास्थ्य स्वयंसेविका कल्पना थापा कोभिड—१९ के माहामारीमे नगरपालिकासे महिला स्वास्थ्य स्वयंसेविकाहुकनहे जनचेतनाके लाग परिचालन करे नाइसेकल बटैली ।
