मुख्यमन्त्री भट्टसे प्रदेश गौरब कालोपत्रे सडकके शिलन्यास
पहुरा समाचारदाता
धनगढी, २३ कुवाँर । सुदूरपश्चिम प्रदेशके मुख्यमन्त्री त्रिलोचन भट्ट प्रदेश गौरवके सडक (भजनी छोटी भन्सार–खिमडी–ठूलीगाड) अन्र्तगत कैलालीके बर्दगोरिया पर्ना बौनिया–फलबिसना सडक खण्ड कालोपत्रे कार्यके शिलन्यास करले बाटै ।
तीन किलोमिटर ढिउर कालोपत्रे हुइना उक्त सडकके लाग करिब १२ करोड रकम बिनियोजन हुइलेसे फेन ७ करोडमे ठेक्का सम्झौता हुइल पूर्वाधार विकास कार्यालय कैलालीके प्रमुख ईञ्जिनीयर श्यामबहादुर खड्का जानकारी डेलै ।
सडक शिलन्यास कार्यक्रमहे सम्बोधन करटी मुख्यमन्त्री भट्ट सुदूरपश्चिमके गाउँबस्तीमे सडक सञ्जाल पुगाइक लाग प्रदेश सरकार लागल बटैलै । ओस्टके मुख्यमन्त्री भट्ट बर्दगोरिया गाउँपालिका वडा नं. ६ झक्कडपुर घैला नालामे पक्की पुल फेन शिलन्यास करल रहिट ।
ओस्टके मुख्यमन्त्री लम्कीचुहामे रहल सामुदायिकक जनता हस्पीटलके अनुगमन फेन करले बाटै । मुख्यमन्त्रीसंगे सुदूरपश्चिम प्रदेशके भौतिक पूर्वाधार विकास मन्त्री पठान सिंह बोहराके फेन सहभागिता रहल रहे ।
