थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १९ अगहन २६४६, सोम्मार ]
[ वि.सं १९ मंसिर २०७९, सोमबार ]
[ 05 Dec 2022, Monday ]

थारु भाषा, संस्कृति बँचैना अभियान

पहुरा | २ कार्तिक २०७७, आईतवार
थारु भाषा, संस्कृति बँचैना अभियान

कौनो जातिके पहिचान विलैना बा कलसे उ जातिके भाषा ओ संस्कृति विलाई परठ कैखे अंग्रेजीम एक्ठो कहाई बा । हुइना फे भाषा ओ संस्कृति विलाईट कलसे कौनो फे जातिके पहिचान सुस्ट सुस्ट हेरैटी जाइट । उहहोर्सेँ आपन भाषा ओ संस्कृति के संरक्षण कर्ना स्वयम् उह जातिक ब्यक्ति ओ समुदायके मुख्य जिम्मेवारी हो । ओ आपन देशक कौनो फे जातिक भाषा ओ संस्कृति संरक्षण कर्ना राज्यक फे दायित्व हो । यिह बाट हँन मनन् कैखे अन्तरिम संबिधान २०६३ म रलक भाषा ओ संस्कृति से सम्वन्धित ब्यवस्था हन नेपालके संविधान (२०७२) म निरन्तरता डे गैल बा । नेपालक संविधान २०७२ के भाग १ प्रारम्भिक खण्ड के धारा ६ म नेपालम वोल्ना सक्कु भाषा राष्ट्र भाषा हो । धारा ७ (२) म नेपाली भाषाक अतिरिक्त प्रदेश सरकार आपन प्रदेश भिट्टर बहुसंख्यक जनता बोल्ना एक वा एक्ठो से ढेर भाषाहन प्रदेश कानून अनुसार के सरकारी कामकाजी भाषा निर्धारण कर सेक्ना बा कैख लिखल बा । ओस्टक भाग ३ मौलिक हक ओ कर्तब्य अन्तर्गत धारा ३२(१) म सक्कु ब्यक्ति ओ समुदायहन आपन भाषा वेल्स पैना, ३२ (२) म सक्कु ब्यक्ति ओ समुदायहन आपन सांस्कृतिक जिवनम सहभागि हुइना हक, धारा ३२ (३) म नेपालम बसोवास कर्ना सक्कु नेपाली समुदायहन आपन भाषा, लिपि, संस्कृति, सांस्कृतिक सभ्यता ओ सम्पदाके सम्वद्र्धन ओ संरक्षण कर्ना हक हुइना कैखे ब्यवस्था कैल बा ।

२०५१ भदौ १ गतेसे रेडियो नेपालमसे थारु भाषाम समाचार प्रशारण शुरु हुइल, जुन हम्र थारु जाति आपन भाषाम समाचार सुन्ना मौका पैलि । ओस्टक गोरखापत्रम २०६४ असोजम थारु भाषाक पृष्ठ कैखे पाना छुट्यागैल । स्थानिय एफएम रेडियोमसे थारु भाषाम समाचार ओ कार्यक्रम कर पैना कैखे छुट्यागैल बा जुन हमार थारुहुकनक लाक आपन भाषा ओ संस्कृति बारेम पस्कना अवसर मिलल बा । २०५६÷०५७ सालम पाठ्यक्रम विकास केन्द्र कक्षा ५ सम्मक लाक थारु भाषाम पोस्टा तयार कर्ल बा । पाठ्यक्रम विकास केन्द्रक यी पहल सकारात्मक बा लेकिन उ थारु भाषाम तयार हुइलक पोस्टा हाल कौनो फे स्कुलम पढाई शुरु नैहुईल हो । आशा करी, झट्टहँ उ पोस्टा स्कुलम पढाई ह्व्याए कैखे ।

भाषाहँन कसिक शुद्ध बनैना हो कैखे बिचार विमर्श कर्ना मजा हो लेकिन एक्ठो ब्यक्तिम केन्द्रित होके टिकाटिप्पणी कर्ना मजा नै हो कना म्वार ब्यक्तिगत बिचार हो । एक डुसरम टिका टिप्पणि कैखे आपन बिचार सञ्चार माध्यम ओ सामाजिक सञ्जालम प्रस्तुत कर्नासे मजा सामुहिक रुपम जमघट होके बिचार लेना डेना मजा हो कि कनास लागठ ।

थारु जातिके भाषा ओ संस्कृति संरक्षण कर्ना स्थानिय सरकारके फे दायित्व हो । उहो होर्से दाङ जिल्लक घोराही उप–महानगरपालिका, बर्दियक बाँसगढी नगरपालिका थारु भाषाहन सरकारी कामकाजी भाषा कैखे मान्यता डे राखल । उपमहानगरपालिकाक यि ब्यवस्थाहन हम्र थारु हुक्र कट्ठ्याक लागु करटी ? यी बाट बिचार कर पर्ना बा । काखर कि ब्यबस्था सरकार कर्ना हो उ ब्यबस्थाहन ब्यबहारम लागु कर्ना जिम्मेवारी उह जातिक ब्यक्ति ओ समुदायके हो ।

थारु भाषा ओ संस्कृतिक संरक्षण करक लाक दाङम थारु कल्याणकारिणी सभा दाङ देउखर कुछ चासो डेखाइल बा । उहो होँर्से सभाके अगुवाईम कक्षा ५ सम्मक लाग थारु भाषाम पाठ्यक्रम तयार फे हुइल बा । लेकिन पोस्टा तयार नैहुइल हो । ढिर ढिर थारु भाषक पोस्टा फे तयार हुई ओ हमार लर्कावन आपन भाषम स्कुलिम पह्र पैहीँ । अस्रा करी, उ दिन झट्ह ड्याख मिली कैखे ।

पाछक समयम हमार थारु जाति के कुछ अग्रज हुक्र थारु भाषाम शुद्धाशुद्धीम रुचि डेखाईल बाट । पत्रिका ओ सामाजिक सञ्जालम (फेसवुक) फे थारु भाषाहन कसिक निमाङ (शुद्ध) बनैना हो कैखे बिचार विमर्श हुइटी बा । जुन हमार लाक खुसी ओ गर्वके बाट हो । २०७७ साउन ३ गते “हमार पहुँरा” डटकमम थारु जातिके इतिहासकार ओ पूर्व राज्यमन्त्री महेश चौधरीज्यू “थारु भाषिक शुद्धतामा प्रश्न” शिर्षकम थारु भाषाहन कसिक शुद्ध बनैना कैखे आपन बिचार धैरख्लह, जुन एक हदसम्म तरङ्ग लानल । २०७७ असोज १९ गते केरनी न्यूजम थारु भाषाविद एवं संस्कृतिविद अशोक थारु ज्यू “थारु भाषा बोल्दा अन्य भाषाका शब्द घुसाएर कुरुप नबोलौँ” कैखे लेख लिख्ल । भाषाहँन कसिक शुद्ध बनैना हो कैखे बिचार विमर्श कर्ना मजा हो लेकिन एक्ठो ब्यक्तिम केन्द्रित होके टिकाटिप्पणी कर्ना मजा नै हो कना म्वार ब्यक्तिगत बिचार हो । एक डुसरम टिका टिप्पणि कैखे आपन बिचार सञ्चार माध्यम ओ सामाजिक सञ्जालम प्रस्तुत कर्नासे मजा सामुहिक रुपम जमघट होके बिचार लेना डेना मजा हो कि कनास लागठ । एक्ठो कहाई बा “भाइ फुट गवाँर लुट” हमार थारु जातिक भाषा विवाद सार्वजनिक करलसे मजा हमार थारु अग्रज हुक्र एक ठाउँम जुटके कसिक हमार भाषाहन निमाङ (शुद्ध) बनैना हो कैखे छलफल कर्लसे आमिन मजा हुई कि ? सायद यि विषयम सामुहिक रुपम बिचार विमर्श फे हो स्याकल बा ओ फेरफेर कर्ना जरुरी बा ।

ओस्टक साहित्यकार सोम डेमनडौरा ज्यू “थारु मानक भाषा” शिर्षकम भर्चुअल रुपम बहस चलैटी बाट जुन एक्ठो उदाहरणिय काम हो । आजके जमाना सञ्चारके हो । आजकाल बिचार विमर्श लेना डेना लिरौसी माध्यम कलक सञ्चार ओ सामाजिक सञ्जाल हुइल बा । ओस्टक फेसवुकम लेखक सवि थारुज्यू “थारु मानक भाषा” हन शुद्ध कराईलाक मानक भाषा, माणक भाषा, मानक भासा कैखे मानक कलक काहो ट ? कैखे आपन बिचार धैरख्ल जुन बाट जायज फे बा । उहाँ आघ प्रश्न कर्टि लिख्ल बाट कि मानक भाषाक सवाल का साहित्यम केल्ह लागु हुइना हो ? उहाँ थारु मानक भाषाहँ जाट्टिहँसे मानक बनिना हो कलसे पैल्ह थारुहुकनक बहुसंख्या रहल प्रत्येक पालिकाम जो थारु भाषा कामकाजी भाषाक रुपम लागु कर पर्नाम जोर डेल बाट ।

एक्ठो जिल्लक, ठाउँक भाषा और जिल्लक ठाउँक भाषा हुवहु नै मिलठ । उदाहरणके लाक सल्यानम बोल्ना नेपाली भाषा जाजरकोटम बोल्ना नेपाली भाषा हुवहु नै मिलठ । दाङ उपत्यकाम बोल्ना थारु भाषा देउखरम बोल्ना थारु भाषा हुवहु नै मिलठ । सायद म्वार बिचारम शब्द ओ भाषा हुवहु मिल्ना कठिन बा जसिन लागठ । उहमारफे हम्र सक्कु ठाउँक भाषाहन सम्मान ओ स्विकार कर पर्ना अबस्था बा । लेकिन भाषाहँन कसिक शुद्ध बनैना विषयम बिचार विमर्शके साथ साथम हम्र आपन थारु भाषाहन कसिक लोप ह्वाय नै डेना हो कैखे फे बिचार विमर्श कर्ना जरुरी बा । उदाहरणके लाग दाङक घोराही उपमहानगरपालिकाम थारु भाषाहँन सरकारी कामकाजी भाषा मान्यता डेना कैखे ब्यबस्था कै राखल तर हम्र थारु जाति उपमहानगर पालिकाम कामकाज करबेर का हम्र थारु भाषाम एक्ठो निवेदन डे रख्ली ? यदि हम्र थारु हुक्र उपमहानगर पालिकाम थारु भाषाम निवेदन नै डेल हुइ कलसे थारु भाषाहन सरकारी कामकाजीक रुपम मान्यता डेना कैखे उपमहानगरपालिकाके ब्यवस्था कर्लक का अर्थ रहल ट ? का हम्र आपन थारु भाषक ओ संस्कृतिके अधिकार मंग्ना केल्ह हो ट ? ब्यबहारम लागु नै कर्ना हो ट ? कठ अधिकार के साथ साथम दायित्व फे ज्वारल रहठ । हम्र आपन भाषा ओ संस्कृतिक अधिकार मंग्ठी कलसे उ ब्यबस्थाहँन लागु कर्ना हमार दायित्व फे हो ।

हम्र नेपाली भाषा नै बोल्क नै हुइना ठाउँम नेपाली भाषा बेल्सी लेकिन आपन भाषा ओ संस्कृति बिलैना मेरके नेपाली भाषा नै वेल्सि । जिल्ला, ठाउँ अनुसारके भाषा ओ संस्कृतिहँन सम्मान कर्टि थारु भाषाहँन कसिक निमाङ (शुद्ध) बनैना ?

हमार जातिम पुर्खनसे मन्टि अइलक कुछ संस्कृति ओ भाषा हेरैटि जाइटा । लेकिन नेपाली भाषा ओ संस्कृति हन भित्रैटि बाटि । हमार थारु हुकनक डस्याम सख्या नाच नच्ना चलन हेरैटि बा कलसे डेवारिम भाइटिका लगैना ओ देउसी भैलो खेल्ना चलन वहर्टि वा । का हम्र तिहारम भाइ टिका नै लगाके नैहुईना हो ? देउसी भैलो नै खेल्क नै हुईना हो ट ? ओस्टक पहिल पहिल गाउँ गाउँम खेन्ह्वा (रविपाट डैना सझ्या ठाउँ) रह गाउँक सक्कु जे खेन्ह्वम रविपाट डैना काम करी कत्रा चौकस लाग सङ्घ सङ्घ रविपाट डाँइवेर । लेकिन आजकाल मेसिनरी जमाना आइल होरसे गोरु ओ राँगाले रविपाट डैना चलन हैरेटि गइल ओ टेक्ट्रर, ठेस्सरले रविपाट डैना चलन आइल । हो जमाना अनुसार हम्र फे चल परठ लेकिन पर्वाटिनके बाहुल्यता रलक गाउँम हमार सझ्या (साझा) खेन्ह्वम मन्दिर बन्टि बा ओ हमार सझ्या खेन्ह्वा हेरैटि बा । का हम्र हमार पुर्खनसे वेल्सलक खेन्वाम हम्र सझ्या घर, भुँह्यार ठान (डिउठन्वा)बनाई नै सेक्ठि ? हमार पुस्टौसे चल्टि अइलक भुँह्यार ठान बनैना ओ पुज्ना संस्कृति बिलैटि जाइटा । याकरलाक स्थानिय सरकारसे सहकार्य कैके भुँह्यार ठान नै वनाई सेक्ठि ?

हमार आपन भाषा फे सुस्ट सुस्ट हेरैटि जाइटा । काखर कि हम्र आपन छाई छावाहँन बोलि फुट्टी किल पर्वाटिनके संभ्रान्त परिवारम बोल्ना भाषा “आइस्यो”, “गईस्यो”, “खाईस्यो”, “बेवी” “मम्मी”, “ड्याडी” जसिन शब्द ब्वाल सिखैठि । यदि सम्मान ओ सभ्य कैख ब्वाल सिखैना हो कलसे हमार जातिम सम्मान कैखे बोलैना सोरी “अप्न”, “टु” जसिन शब्द पलि बा । पर्वाटिनके संस्कार डेके हमार थारु भाषा ओ संस्कृति के संरक्षण हुई ट ? हम्र सामाजिक कार्यकर्ता ओ थारु भाषाके अभियन्ता हुक्र आपन थारु भाषा ओ संस्कृति के वकालत कर्टि बाटि । एक फ्यारा आपन अन्ह्वार ऐनाम हेरी ट ? कहँु हम्र बाहर बाहर थारु भाषा ओ संस्कृति के वकालत कर्ना ओ घरम पर्वाटिनके संभ्रान्त परिवारम बोल्ना भाषा ओ मन्ना संस्कार नैजन्ना मेरसे ट नै डेहटि ? कठ “संसार वडल्ना बा कलसे अप्पनहँसे सुरुवाट कर परठ” । हम्र नेपाली भाषा नै बोल्क नै हुइना ठाउँम नेपाली भाषा बेल्सी लेकिन आपन भाषा ओ संस्कृति बिलैना मेरके नेपाली भाषा नै वेल्सि । जिल्ला, ठाउँ अनुसारके भाषा ओ संस्कृतिहँन सम्मान कर्टि थारु भाषाहँन कसिक निमाङ (शुद्ध) बनैना ? ओ संस्कृति हन कसिक बचैना कैखे सामुहिकम बिचार विमर्श करी ओ एक डुसरम टिका टिप्पणी कर्ना संस्कारहँन कम करि ।

(लेखक अधिबक्ता हुइट ।)

जनाअवजको टिप्पणीहरू