थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४६, सोम्मार ]
[ वि.सं ३० श्रावण २०७९, सोमबार ]
[ 15 Aug 2022, Monday ]

सहकारीसे समर्थन मोलसे १५ प्रतिशत बह्राके धान खरिद

पहुरा | २० कार्तिक २०७७, बिहीबार
सहकारीसे समर्थन मोलसे १५ प्रतिशत बह्राके धान खरिद

टीकापुर, २० कार्तिक । कैलालीके कुछ बीया उत्पादक कृषि सहकारी सरकारसे तोकल समर्थन मूल्यमे १५ से २० प्रतिशत रकम थप कैके किसानसे धान खरिद करटी रहल बाटै ।

किसानसे उत्पादन करल धान सरकारसे निर्धारण करल न्यूनतम समर्थन मूल्य नाइ पाइल गुनासो अइटी रहल बेला कैलालीके किसान भर ढिउर मूल्य पाके खुशी हुइल बाटै । नेपाल सरकार मन्त्रिपरिषद्के गत असार २ गतेके बैठकसे आर्थिक बरस २०७७/७८ के लाग मोटा धान प्रतिक्विन्टल दुई हजार ७३५ ओ मध्यम धानके प्रतिक्विन्टल दुई हजार ८८५ न्यूनतम समर्थन तोकल रहे । कैलालीके कुछ कृषि सहकारी किसानके बीया धान सरकारसे तोकल समर्थन मूल्यमे १५ से २० प्रतिशत थप कैके खरिद करटी रहल बाटै ।

कृषि सहकारीसे किसानहे बीया उत्पादनके लाग मूल ओ प्रमाणीकरणके बीया उपलब्ध कराके प्रथम पुस्ताके उन्नत बीया उत्पादन कैना करल बा । अइसीक किसान गुणस्तरीय बीया उत्पादनके लाग करे पर्ना बाली निरीक्षण, सुपरीवेक्षण, विधि ओ पद्दतिके प्रयोगसे उत्पादन हुइल बियाहे सहकारीसे महंगामे खरिद करटी रहल नमूना बहुउद्देश्यीय सहकारी संस्था टीकापुरके अध्यक्ष जीतबहादुर चौधरी बटैलै । ‘किसाननके उत्पादन उचित मूल्य पाइ पर्ना हमार उद्देश्य हो । हम्रे नै बीया उपलब्ध कराके किसाननहे बीया उत्पादनमे प्रोत्साहन करले रही,’ जीतबहादुर कहलै, ‘उहे बीया सरकारसे तोकलसे कुछ महंगामे खरिद करल हुइटी । तोकलसे ढिउर मूल्य पाइलपाछे किसान खुशी हुइल बाटै ।’

कैलालीके टीकापुर नगरपालिका ओ जानकी गाउँपालिकामे १२ ठो बीया उत्पादक कृषि सहकारी ओ कम्पनी बावै । यी सहकारी ओ कम्पनीसे एक हजारसे ढिउर हेक्टर क्षेत्रफलमे धानके बीजवृद्धि खेती कैके धानके बीया उत्पादन करटी आइल बाटै । अन्य बाली उत्पादनसे बीया बाली उत्पादनमे ढिउर मेहनत तथा किसानसे ध्यान डेहे पर्ना हुइल ओरसे सरकारसे निर्धारण करल समर्थन मूल्यमे प्रतिक्विन्टल ३०० थप कैके किसाननसे खरिद करटी रहल बीजवृद्धि कृषि सहकारी संस्था जानकी गाउँपालिका मुनुवाके प्रबन्धक गोविन्द रावत जानकारी डेलै ।

‘बीयाके लाग करजैना खेतीमे अन्य खेतीसे ढिउर मेहनत लागठ,’ प्रबन्धक रावत कहलै, ‘सहकारीके बैठक बैठके प्रतिक्विन्टल रु ३०० ढिउरमे खरिद कैना निर्णय करली । यिहीसे किसानहे बीजवृद्धि खेती कैना प्रोत्साहनसमेत करी ।’ सरकारसे किसाननसे खरिद करल धानके भुक्तानीे १५ दिनभित्रे किसाननहे डेसेके पर्र्ना व्यवस्था करले बा ।

कृषि सहकारीसे किसानहे रकम भुक्तानी करल प्रमाणके आधारमे सहकारीसे सरकारसे अनुदान पाइ पर्ना व्यवस्था बा । सरकारके समर्थन मूल्यसे ढिउर नै मूल्यमे धान खरिद कैलेसे फेन किसानहे तत्काल नगद रकम डेटी रहल धनसिंहपुर कृषि सहकारीके अध्यक्ष धनसिंह साउद बटैलै । ‘हम्रे प्रतिक्विन्टल रु ४०० ढिउरमे खरिद करटी रहल बाटी,’ अध्यक्ष साउँद कहलै, ‘बरसभर खेती करटी रहल किसान यी बेला धान बेचके हिउँदे खेती कैना तयारीमे बाटै । हम्रे नगद डेके नै खरिद करटी रहल बाटी ।’

बजारमे गल्ला व्यापारी यिहे धान रु दुई हजार १०० सम किल मूल्य डेना करल बाटै । टीकापुरमे खाद्य व्यवस्था तथा व्यापार कम्पनी लिमिटेडसे समेत धान खरिद शुरु करले बा । किसान खाद्यमे मोटा धान प्रतिक्विन्टल रु दुई हजार ७३५ ओ मध्यम धान प्रतिक्विन्टल रु दुई हजार ८८५ मे बिक्री करटी रहल बाटै । सहकारीमे बिक्री करुइया यम्ने १५ से २० प्रतिशत थप रकम पैटी रहल बाटै ।

स्थानीय रामदुलारे चौधरी बजारके मूल्यसे करिब रु एक हजार ढिउर रकम पैना किसानके लाग खुशीके बात रहल बटैलै । ‘यी बरस किसान खेती कैके उचित मूल्य पैले बाटै,’ उहाँ कहलै, ‘मै फेन बिक्री कर्नु । आब किसानन्के ठगवा पैना दिन अन्त्य हुइल बा जस्टे लागल ।’

जनाअवजको टिप्पणीहरू