सुदूरपश्चिममे कोरोना जिटुइया ९ हजार नघलै
पहुरा समाचारदाता
धनगढी, ८ अगहन । सुदूरपश्चिम प्रदेशमे ९ हजार ४७ जाने कोरोना भाइरस जिटके घर लौटल बाटै ।
सुदूरपश्चिम प्रदेश सामाजिक विकास मन्त्रालय प्रशासन तथा योजना अनुगमन शाखासे डेहल जानकारी अन्सार सोम्मारसम १० हजार ८ सय १७ जाने संक्रमित मन्से ९ हजार ४७ जाने कोरोना भाइरस जिटके घर लौटल हुइट ।
प्रदेशमे १ लाख १६ हजार ५ सय ५३ जानेक स्वाव संकलन हुइलमे १ लाख १५ हजार ८ सय ८१ जानेक नमूना जाँच कैगिल मन्त्रालय जनैले बा ।
ओम्नेसे १ लाख ५ हजार ६४ नमूनाके रिपोर्ट निगेटिभ आइल बा कलेसे ६ सय ७२ नमूनाके रिपोर्ट अइना बाँकी रहल बा । सुदूरपश्चिम प्रदेशमे सक्रिय संक्रमितके संख्या १७ सय ३४ रहलमे कैलालीमे सबसे ढेर ७ सय ३२ जाने रहल बाटै ।
कोरोनासे ज्यान गुमुइयाके संख्या ३६ पुगल बा । सोम्मारके रोज ठप ५२ जाने संक्रमित ठपल बटै । ओस्टेक कोरोना भाइरस (कोभिड–१९) के संक्रमणसे देशभर मुक्त हुइलके संख्या २ लाख नाघल बा ।
स्वास्थ्य तथा जनसंख्या मन्त्रालयके अन्सार पछिल्का २४ घण्टामे १९८० संक्रमित ठपेबेर ३ हजार ४३ जाने संक्रमणमुक्त हुइल बाटै । यी संगे नेपालमे कुल संक्रमितके संख्या २ लाख २२ हजार २८८ पुगल बा ।
ओइने मन्से १३ सय ३७ जानेक मृत्यु हुइल बा कलेसे २ लाख २ हजार ६७ जाने संक्रमणमुक्त हुइल बटै ।
