धनगढी उपमहानगरपालिकासे विद्यालय सञ्चालन कैना अनुमति
पहुरा समाचारदाता
धनगढी, ८ अगहन । धनगढी उपमहानगरपालिकासे नगरभिट्टरके विद्यालयहे पठनपाठनके अनुमति डेले बा । उपमहानगरपालिकासे अँट्वारके सामुदायिक तथा संस्थागत विद्यालयहे पत्राचार करटी स्वास्थ्य सुरक्षाके मापदण्ड अपनाके पठनपाठन सञ्चालन कैना अनुमति डेहल हो ।
पत्राचारमे उपमहानगरपालिकासे विद्यालय सञ्चालन कार्यढाँचा २०७७ अनुसार संक्रमणके जोखिम, विद्यार्थी संख्या, भौतिक पूर्वाधारहे हेरके ७ ठो विकल्पके प्रयोग कैके शैक्षिक कार्यक्रम सञ्चालन कैना कहल बा ।
उपमहानगरपालिकासे डेहल विकल्पमे सक्कु विद्यार्थी राखके कक्षा अक्के समयमे सञ्चालन कैना, अलग–अलग सिफ्टमे कक्षा तथा तह सञ्चालन कैना, विद्यालय खुल्ना तथा कक्षा सञ्चालनके अवधि छोट्याइना, अवस्था हेरके टरेक कक्षाहे पहिले वा माथिल्लो कक्षाके विद्यार्थीहे पहिले जोखिम ओ अवस्था हेरके सञ्चालन कैना विकल्प डेहल नगर प्रमुख नृपबहादुर वड जानकारी डेलै ।
ओहकान अनुसार विद्यालय व्यवस्थापन समितिहे शिक्षक, विद्यालय कर्मचारी, विद्यार्थी तथा अभिभावकके सहभागितामे अनिवार्य मास्क लगैना, भौतिक दूरी मिलाके बैठ्ना, खाजा व्यवस्थापन लगायत विद्यालयमे रहेबर वा घर पुगके वा पुगलपाछे पालन करे पर्ना आचारसंहिता समेत बनैना निर्देशन करले बा ।
ओस्टके, कौनो दिन कुछ कक्षा ओ कौनो दिन बाँकी औरे कक्षा सञ्चालन हुइना मेरके पालैपालो सञ्चालन कैना, कक्षाके कुछ विद्यार्थी कौनो दिन वा सिफ्ट ओ बाँकी विद्यार्थी औरे दिन वा सिफ्टमे हुइना मेरके सञ्चालन कैना विद्यालयहे कहल बा ।
ओस्टके, हप्तामे कुछ दिन कुछ घन्टा सञ्चालन कैना विकल्प समेत विद्यालयहे डेहल धनगढी उपमहानगरपालिकाके नगर वड जानकारी डेलै ।
