अत्तरियामे नागरिक आरोग्य सेवा केन्द्र स्थापना
पहुरा समाचारदाता
अत्तरिया, ९ अगहन । गोदावरी नगरपालिका (अत्तरिया) कैलालीमे नागरिक आरोग्य सेवा केन्द्र स्थापना करल बा ।
सुदूरपश्चिम प्रदेशके सामाजिक विकास मन्त्रालय अन्तर्गतके स्वास्थ्य निर्देशनालय सेती आयुर्वेदिक औषधालयसे अत्तरियामे नागरिक आरोग्य सेवा केन्द्र स्थापना करल हो ।
आयुर्वेदिक औषधिप्रति सर्वसाधारणके आकर्षण बर्हटी गैलपाछे नागरिक आरोग्य सेवा केन्द्र स्थापना कैके टमान रोगके विरामीहे निःशुल्क आयुर्वेदिक औषधि उपलब्ध करैना उद्देश्यसे केन्द्र सञ्चालनमे लानल हो । सोममारके एक कार्यक्रमके बिच गोदावरी नगरपालिकाहे टमान प्रकृतिके रोगसे लरे सेक्ना आयुर्वेदिक औषधि सेती आयुर्वेदिक औषधालयसे हस्तान्तरण करल बा ।
प्रदेशके २२ स्थानमे यी मेरके आरोग्य सेवा केन्द्र स्थापना करल बा । सेती आयुर्वेदिक औषधालय धनगढीके प्रमुख खगेन्द्र बम कोरोना भाइरस कोभिड–१९ पाछे यी मेरके आयुर्वेदिक औषधिके माग उच्च रहल ओरसे सेवा केन्द्र नै स्थापना कैके निःशुल्क औषधिके प्रबन्ध मिलाइल बटैलै ।
संघीय सरकारसे प्रत्येक केन्द्रहे ५ लाख २५ हजार बजेट विनियोजन कैके आयुर्वेदिक औषधालय स्थापना कैना उद्देश्यअनुरुप गोदावरीमे फेन सेवा केन्द्र स्थापना कैके निःशुल्क औषधि वितरण कार्य आघे बर्हाइल जनाइल बा ।
कार्यक्रममे गोदावरी नगरपालिकाके नगरप्रमुख हरिसिंह साउँद आयुर्वेदिक औषधि स्वास्थ्यके लाग ढिउर लाभदायी रहल बटैलै । कार्यक्रममे नगरपालिकाके प्रमुख प्रशासकीय अधिकृत देवराज जोशी, नगरपालिकाके प्रवक्ता एवं गोदावरी नगरपालिका–१ के वडा अध्यक्ष शर्मानन्द भट्टलगायत पदाधिकारीके सहभागिता रहल रहे ।
