पेट्रोलियम पदार्थके भण्डारण क्षमता बह्रैना
पहुरा समाचारदाता
धनगढी, ९ अगहन । नेपाल आयल निगमसे सुदूरपश्चिम प्रदेशमे पेट्रोलियम पदार्थके भण्डारण क्षमता बह्रैना लावा डिपो स्थापनाके पहल करल बा । निगम प्रादेशिक कार्यालय, धनगढीके प्रमुख चित्तरञ्जन दास पेट्रोलियम पदार्थके भण्डारण क्षमता बह्रैना सरकारके नीतिअनुसार सुदूरपश्चिम प्रदेशमे लावा डिपो स्थापनाके पहल हुइल बटैलै ।
यकर लाग कैलालीके गोदावरी नगरपालिका, स्याउले बजार लग्गे रहल शिवशक्ति महिला सामुदायिक वन क्षेत्रके जग्गाके पहिचान करल जनाइल बा । उद्योग, वाणिज्य तथा आपूर्तिमन्त्री लेखराज भट्ट नेतृत्वके टोली कुछ दिन आघे उ जग्गाके स्थलगत रुपमे अध्ययन करल रहे ।
‘लावा डिपो स्थापनाके लाग पहिचान करल जग्गा प्राप्तिके पहल करे लागल बा,’ दास कहलै , ‘जग्गा प्राप्तिपाछे ‘भर्टिकल’ ट्यांकीसहितके संरचना निर्माणके प्रक्रिया शुरु करजैना बा ।’
झण्डे चार दशकआघे धनगढीके चटकपुरमे स्थापित निगमके कार्यालय परिसरमे पेट्रोलिम पदार्थके भण्डारण क्षमता घट्टी गैल बा ।
सुदूरपश्चिम प्रदेशमे हाल दैनिक ४०० किलोलिटर डिजल ओ २०० किलोलिटर पेट्रोलके माग रहल जनाइल बा । उ मागके आधारमे निगमसँग तीन दिनहे पुग्ना क्षमताके डिजलके ट्यांकी ओ आधा दिन पुग्ना क्षमताके पेट्रोलके ट्यांकी किल रहल बावै । माग बह्रटी गैलमे डिपोमे भण्डारण करजैना पेट्रोलियम पदार्थसे धाने नाइ सेकके ढुवानी कैना ट्यांकरमे नै पेट्रोलियम पदार्थ भण्डारण करे पर्र्ना अवस्था रहल बा ।
कार्यालय परिसरमे रहल भण्डारण डिपो पाछेक बरसमे मानव बस्तीसे घेरे लागलसंगे कौनो फेन समयमे जोखिम निम्ते सेक्ना खतरा फेन बा । डिपो परिसरमे पेट्रोलियम पदार्थ लेके अइना ट्यांकर पार्किक कैना ठाउँसमेत अभाव होके कार्यालय बाहर रहल ‘छ लेन’ सडकके किनारमे ट्यांकर पार्किक करे पर्र्ना अवस्था रहल बा ।
