लैङ्गिक हिंसा विरुद्धके १६ दिने अभियानके लाग छलफल

पहुरा समाचारदाता
धनगढी, ९ अगहन । लैङ्गिक हिंसा विरुद्धके १६ दिने अभियानके लाग मंगरके रोज धनगढी उपमहानगरपालिकासे समाजिक संघसंस्थासंग छलफल करले बा ।

कोरोना कहरके कारण और वर्षके जस्टे भीड जम्मा करके कार्यक्रम आयोजना करे नाइसेक्ना ओरसे कार्यक्रमके स्वरुप परिवर्तन कैना हुइल बा ।

धनगढी उपमहानगरपालिकाके उपप्रमुख सुशीला भट्ट धनगढी उपमहानगरपालिकाके क्रियाशिल राष्ट्रिय तथा अन्तर्राष्ट्रिय गैरसरकारी संघसंस्थाके प्रतिनिधीहे बोलाके लैङ्गिक हिंसा विरुद्धके १६ दिने अभियानहे कैसिक सफल बनैना कनामे छलफल करटी रहल बटैली । ‘सक्कु जानेक कार्यक्रमहे एकीकृत रुपमे लैजैना बारेमे छलफल हुइल बा । सक्कुहुकनके कार्यक्रम समावेश हुइना करके कार्यक्रमके १६ दिनके लाग योजना बनैना जिम्मा उपमहानगरपालिकाहे डेहल बा ।

ओस्टेक करके धनगढी उपमहानगरपालिकासे बुधके ११ बजे उपमहानगरपालिकाके परिसरमे जनप्रतिनिधी, कर्मचारी ओ और सहभागिहुकनहे उज्जर रिवनके लैङ्गिक हिंसा विरुद्धके लोगो घलाके अभियानके उद्घाटन कैना कार्यक्रम रहल फे उपप्रमुख भट्ट बटैली ।

यकर अगुवाई उपमहानगरपालिकाके महिला शाखा करी । उ पश्चात उपमहानगरपालिकाके महिला जनप्रतिनिधिहुकनहे लैङ्गिक हिंसा न्यूनिकरणके लाग सकारात्मक सोच सम्वन्धी तालिममे सहभागि करजाई ।

धनगढी उपमहानगरपालिकाके प्रमुख प्रशासकीय अधिकृत जगन्नाथ पन्त लैङ्गिक हिंसा विरुद्धके अभियान सक्कु वडामे पुग्ना करके कार्यक्रम तय कैना बटैलै । लैङ्गिक हिंसा विरुद्धके १६ दिने अभियान अगहन १० गतेसे २५ गतेसम चली । यी वर्ष नेपाल सरकारके नारा ‘लैङ्गिक हिंसा अन्त्यके प्रतिवद्धता, व्यक्ति, समाज ओ सक्कुहुनके ऐक्यवद्धता’ रहल बा ।