८ घण्टासम सम्पर्क विहीन डिएसपी बुढीतोलामे शकुसल फेला
पहुरा समाचारदाता
धनगढी, १० अगहन । ईलाका प्रहरी कार्यालय मालाखेतीके इन्चार्ज प्रहरी नायव उपरीक्षक भरतबहादुर चौधरी रातके एकाएक सम्पर्क विहीन हुइलपाछे कैलाली प्रहरीमे हलचल मचल रहे । मंगरके रात एकासि सम्पर्क विहिन बनल उहाँक खोजीके लाग प्रहरी अधिकृत तनावमे परलै ।
९ बजे सम सम्पर्कमे रहल प्रहरी नायव उपरीक्षक चौधरी सम्पर्क विहीन हुइलपाछे रातके उहाँक खोजीके लाग भारी संख्यामे प्रहरी परिचालन हुइल कैलाली प्रहरी जनैले बा । कैलालीके प्रवक्ता प्रहरी नायव उपरीक्षक प्रतिक विष्टके नेतृत्वमे चौधरीके खोजीके लाग रातके टोली खटागिल रहे कलेसे प्रदेश प्रहरी कार्यालयसेफे अलग–अलग टोली परिचालन करल प्रहरी स्रोत जानकारी डेले बा ।
मने प्रहरी नायव उपरीक्षक चौधरी बुधके सकारे कैलालीके बुढीतोलामे सकुसल फेला परल बाटै । ‘रातके सम्पर्क विहीन हुइलपाछे उहाँक खोजीके लाग प्रहरी गम्भिर हुइल सुदूरपश्चिम प्रदेश प्रहरी कार्यालयके प्रवक्ता प्रहरी वरिष्ठ उपरीक्षक मुकेशकुमार सिह जानकारी डेलै ।
प्रहरी स्रोतके अन्सार उहाँ बुढीतोलामे रहल एक होटलमे भेटल हुइट । चौधरीहे अब्बे जिल्ला बोलैना कहल बा । गैल कार्तिक १ गते नियमित गस्तीमे खटल बेला अस्थायी प्रहरी पोष्ट जुगेडाके इन्चार्ज प्रहरी सहायक निरीक्षक गोविन्द बिक ओ प्रहरी जवान रामबहादुर साउदके विभत्स हत्या करल रहे । उ हत्या घटना सेलाई नइपैटी ईलाका प्रहरी कार्यालयके इन्चार्ज सम्पर्क विहिन हुइलपाछे गैल रात सुदूरपश्चिम प्रहरी वृत्तमा तनाव सिर्जना हुइल रहे ।
