वडा कार्यालय भवन शिलन्यास
पहुरा समाचारदाता
धनगढी, ११ अगहन । धनगढी उपमहानगरपालिका–६ के वडा कार्यालय भवनके बिफेक रोज शिलन्यास करल बा ।
धनगढी उपमहानगरपालिकाके प्रमुख नृपवहादुर वड ओ उपप्रमुख सुशीला मिश्र भट्टसे भवनके शिलन्यास करल हुइट । ९० लाखसे ढेरके लागत स्टीमेटमे निर्माण हुइटी रहल वडा कार्यालय भवन एक बर्ष भिटरे निर्माण सम्पन्न हुइना करके ठेक्का सम्झौता करल बा ।
नगरप्रमुख नृपबहादुर वडसे १९ वडा कार्यालय मन्से अधिकांस वडाके भवन निर्माण सम्पन्न हुसेकल बटैलै । बाँकी वडाके वडा कार्यालय भवनफे निर्माण कार्य अपने कार्यकाल भिटरे सम्पन्न कैना नगरप्रमुख वड बटैलै ।
वडा कार्यालय व्यवस्थित नइहुइटसम वडा तहके कार्य सम्पादन व्यवस्थित हुई नइसेकी नगरप्रमुख वड कहलै, टबमारे पूर्वाधार निर्माण प्राथमिकतामे पारल हुई ।
धनगढी उपमहानगरपालिकाके उपप्रमुख सुशीला मिश्र भट्ट समयमे वडा कार्यालय भवन सम्पन्न कैना निर्माण कम्पनी सनलाईज कन्सट्रक्सनसंग आग्रह करली ।
उहाँ कहली, निर्माण कार्य कैसिन हुइटी बा ओकर निगरानी स्थानीय तहसेफे करे परल ।
