सक्कु मेरके हिंसाके अन्त्य हुइपरल : मन्त्री मगर

कञ्चनपुर, ११ अगहन । खानेपानीमन्त्री बीना मगर लैङ्गिक हिंसाविरुद्ध समाज एकबद्ध होके आघे बह्रे पर्ना बटैले बाटी ।

बुधके पुनर्वास नगरपालिकासे लैङ्गिक हिंसाविरुद्धके १६ दिने अभियानके अवसरमे आयोजना करल कार्यक्रममे उहाँ हिंसारहित समाज निर्माणके लाग समाजके हरेक तप्कासे एकबद्ध होके आघे बर्हनाके विकल्प नाइ रहल बटैली ।

समतामूलक समाज निर्माण हुइलपाछे किल विकास ओ समृद्धि आइ सेक्ना उहाँके कहाइ रहे । समुन्नत समाज निर्माणके लाग सक्कुखाले हिंसाके अन्त्य हुइ पर्ना उहाँ बटैली । चुनावके बेला करल प्रतिबद्धताअनुरूपके कार्य आघे बर्हाइल चर्चा करटी उहाँ अधुरा विकास निमार्णके योजना सम्पन्न करक लाग सेक्ना पहल हुइटी रहल बटैली ।

‘विकास निर्माणके कार्यमे राजनीति नाइ करे परल,’ उहाँ कहली, ‘विकास सक्कु जनहनके लाग हो । सक्कु जाने हातेमालो कैके आघे बह्रे परल ।’ सक्कु नागरिकहे स्वच्छ खानेपानीके पहुँचमे पुगैना लक्ष्य लेहल बातमे फेन जोड डेटी उहाँ यकर लाग खानेपानीके कुछ आयोजना पूरा हुइल ओ कुछ आयोजना निर्माणाधीन अवस्थामे रहल बटैली ।