कानूनी प्रक्रिया पुगाके विवाद समाधान कैना आग्रह
पहुरा समाचारदाता
धनगढी, १२ अगहन । कैलाली जिल्ला अदालतके न्यायधिश श्रीमान जयनन्द पनेरु कानूनी प्रक्रिया पुरा करके विवाद समाधान कैना आग्रह करले बाटै ।
जिल्ला समन्वय समिति कैलालीके समन्वय तथा प्राकृतिक स्रोत द्वन्द्व रुपान्तरण केन्द्र नेपालके आयोजनामे केन्द्र सन २०२२ सम संचालन करे लागल छैठौ चरण दिगो बृद्धि कार्यक्रमके जानकारी डेहक लाग विफेक रोज धनगढीमे करल जिल्ला स्तरीय अभिमुखीकरण गोष्ठीमे श्रीमान पनेरु जैसिनफे विवाद ओ मुद्दा कानूनी प्रक्रिया पुरा करके समाधान कैना आग्रह करल रहिट ।
कार्यक्रमके वडका पहुनाफे रहल उहाँ न्यायिक समितिमे होए वा प्राकृतिक स्रोत द्वन्द रुपान्तरण केन्द्र नेपालसे बहु सरोकारके विषयमे जल, जंगल जमिनके विवाद मिलाईबेर होए कानूनी प्रक्रिया पुगैना जरुरी रहल उहाँ बटैलै । संघियता लागु हुइलपाछे स्थानीय तह, प्रदेश ओ संघीय सरकारहे काम बाँडफाँड करल उहाँ बटैलै ।
घोडाघोडी नगरपालिकाके नगर प्रमुख ममताप्रसाद चौधरी स्थानीय सरकार आइलपाछे ढुङगा, गिट्टी, बालु उठैना काम व्यवस्थित बनाइल बटैलै ।
स्थानीय तहमे महिना पिच्छे प्रमुख प्रशासकीय अधिकृत फेरल कारण काम कैना गाह्रो हुइल उहाँ कहलै । स्थानीय तहविच सीमाना विवाद हुइल कहटी अनावश्यक विवाद कैनासेफे मिलके गैलेसे मजा हुइना उहाँ कहलै । जमिन, सामुदायिक वन स्थानीय तहके नइहुके सरकारके रहल ओरसे अधिकार कर्तव्य पत्ता नइपाइल कारण विवाद करटी रहल नगर प्रमुख चौधरी कहलै ।
कार्यक्रममे गौरीगंगा नगरपालिकाके उपप्रमुख अञ्चला चौधरी, जानकी गाउँपालिकाके उपाध्यक्ष उमा महतो, लम्की चुहा नगरपालिकाके उपप्रमुख टिका थापा, टीकापुर नगरपालिकाके नगर उपप्रमुख केशरी विष्ट न्यायिक समितिमे महिला हिंसा ओ डेवानी मुद्दा ढेर आइल बटैले रहिट ।
कार्यक्रममे प्राकृतिक स्रोत द्वन्द रुपान्तरण केन्द्र नेपाल कैलालीके जिल्ला संयोजक नेत्रप्रसाद खनाल मेलमिलाप प्रक्रिया यकर चरणबारे जानकारी डेहल रहिट । उहाँ कहलै, ‘प्राकृतिक स्रोत द्वन्द रुपान्तरण केन्द जल, जंगल जमिनमे हुइल बहुसरोकारके विवाद मिलैना कार्य करठ ।’ २०७० जेठ २७ गते स्थापना हुके २०७० असार १३ गते जिल्ला प्रशासन कार्यालय भक्तपुरमे दर्ता हुके अनौपचापरिक कानूनी मान्यता प्राप्त करके अभिन पुरान–पुरान विवाद दुनु पक्षके जित हुइना करके मिलाइल उहाँ बटैलै ।
जिल्ला समन्वय समिति कैलालीके सभापति सूर्यबहादुर थापाके अध्यक्षतामे हुइल कार्यक्रमके संचालन केन्द्रके सहजकर्ता दीपु चौधरी ओ स्वागत मन्तव्य केन्द्रके पश्चिम क्षेत्रीय संयोजक बल्लु चौधरी करले रहिट ।
कार्यक्रममे जिल्ला समन्वय समितिके उपप्रमुख सुन्दरी चौधरी, कैलाली जिल्लाके स्थानीय तहके प्रमुख, उपप्रमुख ओ टमान संघ संस्थामे प्रतिनिधिहुकनके सहभागिता रहल रहे ।
