योजना डुब्लीकेशनके सम्भावना ढेर
पहुरा समाचारदाता
धनगढी, १२ अगहन । प्रदेश ओ स्थानीय सरकारविचके समन्वय न्यून रहल जनप्रतिनीधिहुक्रे बटैले बा ।
‘प्रदेश मानवअधिकारके अवस्था तथा स्थानीय ओ प्रदेश सरकारविचके समन्वय’ विषयक संवाद कार्यक्रममे सहभागी नगरपालिका तथा गाउँपालिका प्रमुख, उपप्रमुख उ बाट बटाइल रहिट ।
पुनर्वास नगरपालिकाके नगर प्रमुख जीवन थापा तीन तहविच समन्वय नइहुके कौनो ठाउँ योजना दोहरैना कहु योजना नइपरल बटैलै । उहाँ कहलै, ‘पुनर्वास नगरपालिका एक्के ठाउँमे तीन तहसे अनुदान डेहल रहे, कलेसे कहु–कहु विकासे योजना नइपरल भेटागिल बा ।’ कोभिड–१९ आइलपाछे सबसे ढेर प्रभाव स्थानीय तहमे परल नगरप्रमुख थापा बटैलै ।
कैलारी गाउँपालिकाके अध्यक्ष लाजुराम चौधरी प्रदेश सरकारसे नानल नीति तथा कानूनबारे स्थानीय तहमे पत्ता नइहुइना बटैलै । प्रदेश सरकार ओ स्थानीय सरकारविच अन्तरसम्बन्ध नइहुइल कारण कहु योजना डुब्लीकेशन हुइना, कहु नइपैना समस्या रहल उहाँ कहलै । लकडाउनके बेला ढेर जैसिन मनै कोरोना लागके नाही ओकर प्रभावसे ज्यान गुमाइल ओरसे तथ्याङक राखे पर्ना जरुरी रहल उहाँ कहलै ।
वेदकोट नगरपालिकाके नगर प्रमुख अशोक चन्द संघ, प्रदेश ओ स्थानीय तह विच समन्वय नइहुके विकासे योजना पाछे परल बटैलै । उहाँ कहलै, ‘स्थानीय तहसे करे पर्ना काममे प्रदेश ओ संघीय सरकारसे हस्तक्षेप कैजाइटा, दुईसे पाँच लाखके योजना स्थानीय तहसे करे सेक्जाइठ, मने ओम्ने संघ ओ प्रदेश सरकारफे हात डरटी बा ।’ लकबन्दीके बेला सर्वदलिय ओ सर्वपक्षित समिति बनाके आघे बह्रल ओरसे अपन नगरमे सक्कु काम पारदर्शि रहल उहाँ कहलै । वेदकोट नगरपालिकाहे हिंसामुक्त बनाइक लाग लागल नगरप्रमुख चन्द बटैलै ।
कृष्णपुर नगरपालिकाके नगर प्रमुख कर्ण चन्द कोभिड–१९ के कारण लकबन्दी सुरु हुइलपाछे स्थानीय सरकार जनताहे स्वास्थ्य सुरक्षा डेहक लाग रातदिन खटल बटैलै ।
धनगढी उपमहानगरपालिकाके नगर उप प्रमुख शुसिला मिश्रभट्ट लकबन्दीके बेला सबसे ढेर न्यायिक क्षेत्रमे असर परल बटैली । महामारीके बेला न्यायलय बन्द हुइलपाछे ढेर पीडित न्याय पैनासे बन्चित हुइल उहाँ बटैली । उहाँ कहली, स्थानीय तथा प्रदेश सरकारके कार्यकाल आब डेढ बर्षके बाँकी बा, मने यी विच सहकार्य ओ समन्वय न्युन रहल ।’
गोदावरी नगरपालिकाके नगर उपप्रमुख रत्ना कडायत कोरोनाके कारण सुदूरपश्चिम प्रदेशमे सबसे ढेर गोदावरी नगरपालिका जोखिम मोलल बटैली । नगरपालिकामे ७४५ जाने संक्रमित हुइनाके साथे पाँच जानेक ज्यानफे गैल उहाँ बटैली ।
राष्ट्रिय मानव अधिकार आयोगके प्रदेश प्रमुख झकर रावल मानव अधिकारके संरक्षण तथा सम्वद्र्धनमे प्रदेश ओ स्थानीय तहके भूमिका विषयक कार्यपत्र प्रस्तुत करटी कोभिडसे सबसे ढेर असर स्वास्थ्य, रोजगार तथा व्यवसाय, शिक्षा ओ विकास तथा योजना कार्यान्वयनमे परल बटैलै ।
एडजस नेपालके अध्यक्ष चित्रा पनेरु प्रदेश सरकारके नीति तथा कानून बनेबेर नागरिक समाज तथा सरोकारवालासे समन्वय तथा छलफल नइकरल भेटगिल बटैली । उहाँ कहली, प्रदेश सरकारसे अभिन ४२ ठो कानून बनाइल मने ग्रामीण जनतासम प्रचार प्रसार नइपुगल हो ।
गैर सरकारी संस्था महासंघ सुदूरपश्चिम प्रदेश संयोजक देवी खनाल तीन तहके सरकार आ–अपन तालके आघे बह्रल कारण विकासे योजना गति लेहे नइसेकल बटैलै ।
प्रदेश सभा सदस्य पूर्णा जोशी एक दुसरके सहअस्तित्व स्वीकार करे नइसेकल कारण तीन तहविच समन्वय शुन्य रहल बटैली । प्रणालीके शासनके निमित्त सुशासनफे कब्जामे हुइल उहाँ बटैली । सुदूरपश्चिम प्रदेशमे महिला हिंसाके घटनामे बृद्धि हुइल कहटी न्यूनिकरणके लाग सबसे आ–अपन ठाउँसे लागे पर्ना प्रदेशसभा सदस्य जोशी बटैली ।
प्रदेशसभा सदस्य भरत खडका लकबन्दीके बेला टमान स्थानीय तहमे ढेर गुनासो आइल बटैलै । महामारी सुरु हुइलपाछे उपचारके अवस्था दयनिया, कतिपय ठाउँमे राहत वितरणमे एक द्वार प्रणाली लागु नइहुइल डेखल उहाँ बटैलै । उहाँ कहलै, ‘कोभिडसे सक्कु क्षेत्रमे नइसोचल क्षति पुगाइल, कोरोना लौवा पाठ सिखाइल मने उ अन्सार सरकार आघे बह्रे नइसेकल हो ।’
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश ओ राष्ट्रिय मानव अधिकार आयोग सुदूरपश्चिम कार्यालयके संयूक्त आयोजना तथा डिसिएके सहयोगमे हुइल कार्यक्रम हुइल रहे ।
कार्यक्रमके उद्देश्य तथा स्वागत मन्तव्य इन्सेक सुदूरपश्चिम प्रदेश संयोजक खडकराज जोेशी ओ संचालन इन्सेकके कार्यक्रम संयोजक सरिता पुरी करले रहिट । कार्यक्रममे राष्ट्रिय मानव अधिकार आयोग सुदूरपश्चिम कार्यालयके प्रमुख मोहन जोशी लगायत टमान सरोकारवाला निकायके सहभागिता रहे ।
