सडक विस्तारमे सहयोग पुगे कहिके अपनही संरचना भत्कैलै
पहुरा समाचारदाता
धनगढी, १२ अगहन । धनगढी उपमहानगरपालिका वडा नं २ के खगेन्द्र सिंह धामी शुकके धनगढीके चर्च–गुल्म सडक खण्डमे पर्ना अपन ६ कोठे पक्की भवन भत्कैलै ।
क्षेत्रीय शहरी विकास आयोजना अन्तरगतके सडक विस्तार हुइना हुइलपाछे धामी सडक क्षेत्रधिकार भिटर पर्ना संरचना भत्काइल हुइट । सडक विस्तारमे सहयोग पुगे कहिके संरचना भत्काइल हुँ धामी कहलै, ‘सक्कुनके सकारात्कम भूमिकासे केल धनगढीके विकास सम्भव बा । औरहे उत्प्रेरणा दिनके लाग घर भत्काइल धामी बटैलै । अब्बे चर्च–गुल्म सडक १० मिटरके बन्टी बा ।
धामी जस्टे नगरके सडक चाकिर बनाइक लाग धनगढीके घरधनी सडक क्षेत्रधिकार भिटर पर्ना पर्खाल, घर, टहरा भत्काई लागल हुइट । घरधनीहुक्रे अपनही घन, सावल लेके संरचना भत्काई लागल नगरप्रमुख नृपबहादुर वड बटैलै ।
नगरवासी सडक विस्तारके लाग करल सहयोगसे क्षेत्रीय शहरी विकास आयोजना समयमे सम्पन्न हुइनामे ढुक्क बाटी, नगरप्रमुख वड कहलै, स्थानीयके सहयोग बिना कौनाफे ठाउँके विकास करे नाइसेक्जाई ।
उपमहानगरपालिकासे सडक क्षेत्रधिकारमे पर्ना संरचना भत्कैना घरधनीहे आदर्श नगरवासीके रुपमे सम्मान कैना, भत्काइल भागके नक्सापासमे कर छुट कैना, उहे भागमे रंगरोगन करेबेर सहयोग कैना निर्णय करल नगरप्रमुख वड बटैलै ।
