बालिका हत्याराहे कारबाहीके माग करटी प्रधानमन्त्रीहे ज्ञापन

पहुरा समाचारदाता
धनगढी, १२ अगहन । महोत्तरीके ६ वर्षिया बालिका गुलाब खातुनके हत्याराहे फाँसीके सजाय वा आजीवन कारावासके सजाय सहित कडा कारबाहीके माग करटी प्रधानमन्त्री केपी शर्मा ओलीहे ज्ञापनपत्र बुझागैल बा ।

मेची–महाकाली बुहारी संयुक्त आवाज प्रधानमन्त्री ओलीहे उ ज्ञापनपत्र बुझाइल हो । कैलालीके प्रमुख जिल्ला अधिकारी यज्ञ बोहरामार्फत मेचीमहाकाली बुहारी संयुक्त आवाजके कैलाली संयोजक जागृती बोगटी उ ज्ञापनपत्र बुझैली ।

संयुक्त आवाजके कैलाली संयोजक बोगटी उ घटनासे हम्रिहिन सबहे गम्भीर बनाइल उल्लेख करटी पीडकहे कडा कारवाही हुइपरना बटैली । पीडकहे कडा कारवाही नैहुइलेसे अप्नेहुक्रे कडा आन्दोलन करना बाध्य हुइना उहाँ बटैली ।