मुख्यमन्त्री भट्ट ओ अनुगमन टोलीबीच छलफल
पहुरा समाचारदाता
धनगढी, १२ अगहन । सुदूरपश्चिम प्रदेशके मुख्यमन्त्री त्रिलोचन भट्ट ओ संघीय सरकारके टमान निकायसे विकास आयोजनाके अनुगमन करे आइल एक टोलीके प्रतिनिधिबीच शुकके रोज धनगढीमे छलफल हुइल बा ।
उ टोलीके प्रतिनिधि ओ मुख्यमन्त्रीके बीच मुख्यमन्त्री तथा मन्त्रिपरिषद्के कार्यालय धनगढीमे हुइल भेटमे सुदूरपश्चिम प्रदेशमे सञ्चालित राष्ट्रिय गौरवके आयोजनाके बारेम छलफल हुइल रहे ।
ओस्टके प्रदेश ओ संघीय सरकारसे संयुक्त रुपमे सञ्चालित सडकलगायत विकास आयोजनाके विषयमे छलफल हुइल मुख्यमन्त्रीके स्वकीय सचिव शिवसिंह ओली जानकारी डेलै ।
उ टोली शुकके कैलालीके पूर्वी क्षेत्रमे निर्माणाधीन राष्ट्रिय गौरवके रानी जमरा कुलरिया सिँचाइ आयोजनाके स्थलगत अनुगमन निरीक्षण कैना बटाइल बा ।
टोलीमे राष्ट्रिय योजना आयोगके सदस्य डा.कृष्णप्रसाद ओली, प्रधानमन्त्री तथा मन्त्रिपरिषद् कार्यालयके विकास व्यवस्थापनविज्ञ गजेन्द्र थपलिया, सिँचाइ विभागके महानिर्देशक लगायत सहभागी रहल बाटै ।
