पुर्पक्षके लाग ६ जाने कारागार चलान

पहुरा समाचारदाता
धनगढी, १४ अगहन । कैलालीमे २ किशोरीहे सामूहिक बलात्कार करुइया ६ जाने पुर्पक्षके लाग कारागार चलान हुइल बाटै ।

गत कार्तिक ८ गते जानकी गाउँपालिका वडा नम्बर ५ मे १३ ओ १४ वर्षीया किशोरीहे सामूहिक बलात्कार करल अभियोगमे पक्राउ परल ६ जाने जिल्ला अदालतके आदेशपाछे कारागार चलान हुइल प्रहरी जनैले बा ।

जिल्ला प्रहरी कार्यालयके प्रवक्ता प्रहरी नायब उपरीक्षक प्रतीक विष्ट बलात्कार आरोपमे पक्राउ परल जानकी गाउँपालिका वडा नम्बर ५ के धिरेन्द्र विष्ट, नरेश चौधरी, रमेश शाही, रामबहादुर चौधरी, मनोज चौधरी ओ महेश चौधरी पुर्पक्षके लाग कारागार चलान हुइल जानकारी डेलै ।

ओहकान अनुसार सामूहिक बलात्कार आरोपमे पक्राउ परल मध्ये कृष्ण नगरकोटी ओ सत्यम रावलहे भर बाल सुधार गृहमे राखल बा ।

६ जाने पुर्पक्षके लाग कारागार ओ २ जाने बाल सुधार गृह पठाइल रलेसे फेन एकजाने भर आभिन फरार रहल बाटै । इलाका प्रहरी कार्यालय टीकापुरके प्रमुख प्रहरी नायब उपरीक्षक मधुसुदन न्यौपान फरार रहल चन्द्र शाहीके खोजी कार्य जारी राखल बटैलै ।