गृहिणीहे आचार बनैना तालिम
पहुरा समाचारदाता
अत्तरिया, १५ अगहन । घरमे बैठल महिला श्रमिकहे सीप प्रदान करके व्यावसायिक बनैना उद्देश्यसे अत्तरियामे आचार बनैना तालिम सुरु कैगिल बा ।
नेपाल गृह श्रमिक संघ, सुदूरपश्चिम प्रदेशके आयोजना ‘श्रमके सम्मान करी, श्रमशक्ति राष्ट्रशक्ति हो’ कना नाराके साथ नेपाल ट्रेड यूनियन काँग्रेस ओ डब्लुएसएमके सहयोगमे गृहश्रमिकके लाग सीपमूलक तालिम कार्यक्रम अन्तर्गत आचार बनैना तालिम सुरु करल हो ।
तालिम उद्घाटन कार्यक्रम नेपाल गृह श्रमिक संघ, सुदूरपश्चिम प्रदेश अध्यक्ष तुलसी देवकोटाके अध्यक्षता तथा नेपाल ट्रेड यूनियन काँग्रेस सुदूरप्र्रश्चिम प्रदेश अध्यक्ष सिद्धराज भट्टके वडका पहुनामे हुइल रहे ।
कार्यक्रममे विशिष्ट पहुना नेपाल ट्रेड यूनियन काँग्रेस कैलाली जिल्ला अध्यक्ष ज्ञानेन्द्र शाह, पहुनामे जिल्ला सहकारी संघ कैलालीके अध्यक्ष फणी सापकोटा लगायतके रहिट । कार्यक्रमके स्वागत मन्तव्य यादी रावत ओ सञ्चालन वन वातावरण श्रमिक संघ सुप प्रदेश अध्यक्ष डण्डीराज सुवेदी करले रहिट । कलेसे प्रशिक्षण धर्मा धामी डेटी बाटी ।
