पूर्वाधार विकासके बजेट दुरुपयोग हुइल निष्कर्ष
पहुरा समाचारदाता
धनगढी, १५ अगहन । कैलालीके १३ स्थानीय तहके समन्वय बैठक अँटवारके रोज कैलारी गाउँपालिकाके कोइलहीमे हुइल बा ।
कैलारी गाउँपालिकाके अध्यक्ष लाजुराम चौधरीके अध्यक्षतामे हुइल समन्वय बैठकमे जिल्ला समन्वय समितिके संयोजक सूर्यबहादुर थापा वडका पहुना रहिट । बैठकमे पाँच/छ ठो एजेण्डाउप्पर छलफल तथा निर्णय करल संयोजक थापा जानकारी डेलै ।
उहाँक अन्सार ढुङगा, गिट्टी, बालु संकलन, छाडा पशु चौपाया व्यवस्थापन, लागुऔषध दुव्र्यशनके रोकथामके बारेमे बैठकमे छलफल करल रहे ।
ओस्टे करके, छलफलमे प्रदेश सभा सदस्यहुकनके स्थानीय पूर्वाधार विकास कार्यक्रम अन्तर्गतके बजेट व्यापक रुपमे दुरुपयोग हुइना करल निष्कर्ष निकारल बा ।
उ बजेट अधिकतम रुपमे सदुपयोग हुई पर्ना ओ ओकर लाग का–का कैना आवश्यक बा, कना विषयमे गम्भीर रुपमे छलफल हुइल थापा बटैलै ।
कोभिड–१९ के संक्रमण रोकथाम ओ नियन्त्रणके लाग स्थानीय तहसे हालसम जनताहे डेटी आइल सेवा यथावत रख्न निर्णय करल उहाँ बटैलै । ओस्टेक, क्वारेन्टाइन व्यवस्थापनके सवालमेफे बैठकमे छलफल करल रहे ।
जिल्ला समन्वय समितिके संयोजनमे टमान समयमे टमान स्थानीय तहमे पालिक पाला करके समन्वय बैठक हुइटी आइल बा ।
कोइलहीमे हुइल बैठकके सञ्चालन कैलारी गाउँपालिकाके सामाजिक विकास शाखा प्रमुख एवम् सूचना अधिकारी यगम कलेल करले रहिट ।
