घोडाघोडीमे १५ शैयाके नगर अस्पतालके शिलान्यास

पहुरा समाचारदाता
सुखड, १६ अगहन । कैलालीके घोडाघोडीमे १५ शैøयाके नगर अस्पतालके शिलान्यास करल बा । वडा नम्बर २ के साँडेपानी स्वास्थ्य चौकीके जग्गामे घोडाघोडी नगर अस्पतालके शिलान्यास करल हो । सोम्मारके देशभरके ३ सय ९६ ठो स्थानीय तहमे एकसाथ अस्पताल शिलान्यास कैना कार्यक्रम अन्तर्गत घोडाघोडीमे फेन १५ शैøयाके नगर अस्पतालके शिलान्यास करल हो ।

कैलाली क्षेत्र नम्बर ३ के प्रतिनिधिसभा सदस्य गौरी शंकर चौधरी, सुदूरपश्चिम प्रदेश सभा सदस्य अमर साउँद, घोडाघोडी नगरपालिकाके नगरप्रमुख ममता प्रसाद चौधरी, उपप्रमुख प्रेम कुमारी थापा अक्केसाथ इँटा राखके नगर अस्पतालके शिलान्यास करल हुइट ।

नगर अस्पताल शिलान्यास हुइलपाछे यी क्षेत्रके जनता खुसी हुइल बाटै । ग्रामीण क्षेत्रमे प्राथमिक स्वास्थ्य सेवा विस्तार कैना उद्देश्यसहित संघीय सरकारसे कैलालीके ५ सहित सुदूरपश्चिम प्रदेशभर ५४ आधारभूत अस्पतालके शिलान्यास हुइल बा ।

घोडाघोडीमे साँडेपानी स्वास्थ्य चौकी, लम्कीचुहा नगरपालिकामे चुहा स्वास्थ्य चौकी, बर्दगोरिया गाउँपालिकामे दोदोधारा स्वास्थ्य चौकी, गौरीगंगा नगरपालिकामे चौमाला प्राथमिक केन्द्र ओ मोहन्याल गाउँपालिकामे १० शैय्याके सुगरखाल स्वास्थ्य चौकीके शिलान्यास हुइल बा । नेपाल सरकारसे देशभरके टमान स्थानीय तहमे ५, १० ओ १५ शैय्याके अस्पताल निर्माणके लाग बजेट समेत विनियोजन करसेकल बा ।