गौरीगंगामे मनोविमर्श केन्द्र स्थापना

पहुरा समाचारदाता
चौमला, १६ अगहन । कैलाली जिल्लाके गौरीगंगा नगरपालिका वडा नम्बर ११ मे सोम्मारके रोज मनोविमशर्म केन्द्र स्थापना कैगिल बा ।

तत्कालके लाग वडा कार्यालयमे मनोविमशर्म केन्दके सम्पर्क कार्यालय रहना करके सहयोग सामाग्रीफे हस्तान्तरण कैगिल बा । उ सामाग्रीमे स्टीलके डराज, चटाई, डस्ना, बच्चनके खेलौना लगायतके रहल बा ।

ओरेक नेपाल कैलालीके जिल्ला कार्यक्रम अधिकृत गीता चौधरीके वडका पहुना तथा गौरीगंगा नगरपालिका वडा नम्बर ११ के अध्यक्ष विनोद कुमार चौधरीके अध्यक्षतामे हुइल रहे ।
कार्यक्रममे उहाँ मानसिक समस्याके कारण ढेर जानेक ज्यान गैल बटैलै । उहाँ कहलै, पहिले–पहिले यी वडामे ढेर मानसिक समस्यासे ग्रासित व्यक्ति रहिट, मनोविमशर्म केन्द्र स्थापना हुइलपाछे ओइने सेवा पाई सेक्ही ।

कार्यक्रममे वडा कार्यपालिका सदस्य केसरानी चौधरी, वडा सदस्य साहेवलाल चौधरी, बुद्धिजीवी सालिभान खाती लगायत मन्तव्य व्यक्त करटी मनोविमशर्म केन्द्र सहयोग कैना प्रतिवद्धता जनैलै ।

महिला, किशोरी समूह, यूवा, सरोकारवाला, जनप्रतिनीधि हुकनसे मनो विमर्श केन्द्रके स्थापना, आवश्यकताबारे मनोविमर्श कर्ता जयकला चौधरी जानकारी डेहल रहिट । वडा कार्यालयके आयोजनामे हुइल कार्यक्रममे सहयोग ओरेक नेपाल करले रहे । ३७ जानेक सहभागितामे हुइल कार्यक्रमके संचालन युवा संजालके सदस्य रितु विक करले रहिट ।