कैलालीमे १५२ लौवा एचआइभी संक्रमित फेला

पहुरा समाचारदाता
धनगढी, १६ अगहन । कैलालीमे एचआइभी एड्सके बिरामी बर्हटी गैल डेखाइल बा । गैल बरस करल परीक्षणमे अक्के आर्थिक बरसमे १५२ जाने एचआइभी एड्सके लावा बिरामी फेला परल बाटै ।
गत आर्थिक बरसमे छ हजार ११३ जनहनके स्वास्थ्य परीक्षण करेबर १५२ जाने लावा संक्रमित फेला परल हुइट । पुष्टि हुइल लावा संक्रमितमे वयस्क पुरुष ५५, वयस्क महिला ५५, ट्रान्स जेन्डर ३८, बालबालिका चार जाने रहल बाटै ।

संक्रमण पुष्टि हुइल उहाँहुक्रे टमान जिल्लाके रहल जिल्ला स्वास्थ्य कार्यालय कैलाली जानकारी डेले बा । उ कार्यालयके अनुसार फेला परल लावा संक्रमितमे कैलालीके ११०, कञ्चनपुरके २५, बैतडीके तीन, बर्दियाके चार, डोटीके, बझाङ, अछाम ओ डडेल्धुराके दुई÷दुई, दार्चुला ओ भारतके एक÷एक जाने रहल बाटै ।

यिहेबीच, प्राणघातक एचआइभी एड्स रोगसे गैल आर्थिक बरसमे ३५ जनहनके ज्यान गैल बा ।
कैलालीसे एआरटी खैटी आइलमध्ये ३५ जाने गत आर्थिक बरसमे ज्यान गुमाइल हुइट । जौनमध्ये छ जाने उहे आर्थिक बरसमे फेला परल लावा संक्रमित रहिट । मृत्यु हुउइयामे बाँकी पहिले एचआइभी पुष्टि हुइल विरामी रहल जिल्ला स्वास्थ्य कार्यालय प्रमुख लालबहादुर धामी बटैलै ।डिसेम्बर १ तारेखके दिन मनैना विश्व एड्स दिवसके अवसरमे टमान कार्यक्रम करजैना प्रमुख धामी बटैलै ।

नेपालके कुल एचआईभी संक्रमितमध्ये ४० प्रतिशत अर्थात १४ हजार ५ सय ४४ जना मात्र एचआईभी संक्रमित उपचार करटी रहलबाटै । २०२० सम सक्कुहनहे उपचारके पहुँचमे पुगैना राष्ट्रिय एड्स तथा यौनरोग नियन्त्रण केन्द्र जनैले रहे ।

नेपालमे एचआईभी संक्रमणके उच्च जोखिममे रहल समुहमे सुईसे लागुपदार्थ प्रयोग करुइया, यौनकर्मी, पुरुष समलिँगी तथा यौनिक तथा लैगिक अल्पसंख्यक समुदाय, खुला सीमाना, वैदेशिक रोजगारीमे रहुइया रहल जनागिल बा ।

नेपालमे खुला सिमाना, सुईसे लागुपदार्थ प्रयोग, असुरक्षित यौनसम्र्पकसे यी रोग सर्ने ओरसे जनचेतनामुलक कार्यक्रम देशभर करटी रहल राष्ट्रिय एड्स तथा यौनरोग नियन्त्रण केन्द्र जनैले बा ।

विश्व स्वास्थ्य संगठन डब्लुएचओके अनुसार विश्वभर ३ करोड ६७ लाख एचआईभी संक्रमण रहल अनुमान बा । विश्वमे करिव ११ प्रतिशतसे लौव संक्रमण घटल बा । कलेसे ४७ प्रतिशत बच्चामे हुइना संक्रमणफे कम हुइल बा । नेपाल सन् २०३० सममे एचआईभी एड्सके संक्रमण दर न्यून कैना लक्ष्य रख्ले बा ।