उदासीपुरमे लवांगी पूजा सुरु

पहुरा समाचारदाता
मसुरिया, १६ अगहन । कैलालीके गौरीगंगा नगरपालिका वडा नम्बर १० उदासीपुरमे आजसे लवांगी पूजा तथा सांस्कृतिक कार्यक्रम सुरु हुइल बा ।

थारु गुरुवा बैदवा समाज सेवा समिति ओ बरघर भलमन्सा समाज गौरीगंगा कैलालीके आयोजनामे हुइटी रहल कार्यक्रमके १७ गतेसम सञ्चालन हुइना बा । कार्यक्रमके प्रचारप्रसार तथा बजार व्यवस्थापन समिति संयोजक दिनेश दहितके अनुसार गैल बरससे सुरु हुइल लवांगी पूजा तथा सांस्कृतिक कार्यक्रम यी साल टिसरा संस्करण हो ।

आज एक कार्यक्रमके बीच विधिवत रुपमे उद्घाटन हुइना कार्यक्रम अन्तरगत आज रातभर ढाक बजैना ओ काल मंगरके रोज पूजापाठ समापन हुइना बा । कार्यक्रममे थारु समुदायके पौराणिक नाचके प्रदर्शन, वैद्धिक गुरुवा नाच, राष्ट्रिय, स्थानीय कलाकारहुकनके प्रस्तुति, स्थानीय भेषभुषा ओ खानपिनके प्रदर्शनी हुइना आयोजक जनैले बा ।