सुदूरपश्चिम १४३ संक्रमित ठप्लै
पहुरा समाचारदाता
धनगढी,१७ अगहन । सुदूरपश्चिम प्रदेशमे १४३ जाने कोरोना भाइरस संक्रमित ठपल बाटै ।
मंगरके रोज प्रदेशके टमान प्रयोगशालामे करल परिक्षणमे १४३ जनहनमे संक्रमण पुष्टि हुइल सामाजिक विकास मन्त्रालय जनैले बा ।
लौव ठपल संक्रमित कैलालीके ७४, कञ्चनपुरके ७, अछामके १८, बैतडीके १७, बझाङ ८, बाजुराके ६, डडेल्धुराके १२ ओ डोटीके एक जाने रहल बाटै ।
सुदूरपश्चिम प्रदेशमे सक्रिय संक्रमितके संख्या १७ सय ओ ११ जाने रहल बाटै । पछिल्का २४ घण्टामे ठप १३०४ जनहनमे कोरोना भाइरस (कोभिड–१९) के संक्रमण पुष्टि हुइल बा ।
ओस्टेक देशभरके प्रयोगशालामे ८ हजार ५८३ नमुना परीक्षण करेबेर ५०१ महिला ओ ८०३ पुरुषमे संक्रमण पुष्टि हुइल हो । यी संगे कुल संक्रमितके संख्या २ लाख ३४ हजार ७५६ पुगल बा । ओइन मन्से २ लाख १६ हजार ५९४ जाने संक्रमणमुक्त हुइल बाटै । कलेसे १५२९ जानेक मृत्यु हुूइल स्वास्थ्य तथा जनसंख्या मन्त्रालय जनैले बा ।
देशभर १६ हजार ६३३ सक्रिय संक्रमित बाटै । ओइने मन्से १० हजार ९९८ होम आइसोलेसनमे बाटै कलेसे ३७० जानेक आईसीयू ओ ६३ जानेक भेन्टिलेटरमे उपचार हुइटी रहल बा ।
