विदेशके कमाही स्वदेशमे लगानी

नरेन्द्र चौधरी
हसुलिया, २० अगहन । वैदेशिक रोजगारसे लौटल कैलाली जिल्लाके युवाहुक्रे विदेशमे कमाइल रुपियासे अपन गाउँठाउँमे व्यवसाय सुरु करले बटै ।

धनगढी उपमहानगरपालिका–१८, तुलसीबारीके सुमन शिवाकोटी विदेशमे कमाइल रकमसे कृषि फर्ममे सञ्चालन करल बटैं । ६ बरष ६ महिना युएई दुबईमे कमाके घर लौटल सुमन अपन कमाहीसे २१ लाख रुप्याँ कृषि व्यवसायमे लगानी करले बटैं ।

‘विदेशमे काम करेबेर दुःख भोग्गिल,’ उहाँ कहलै, ‘विदेशके कमाहीसे स्वदेशमे लगानी कर्र्ना सोच बनाके घर लौटनु, अब्बे तुलसीबारीमे एस एण्ड एस व्यावसायिक कृषि तथा पशुपालन फर्म दर्ता करके कृषि कर्ममे व्यस्त बटु ।’

छेगरीके खोर, मुर्गीके खोर ओ मच्छीपोखरी लगायतके भौतिक संरचना बनैनामे १७ लाख लगानी ओ चार लाख रुप्याके छेगरी, मुरगी ओ मच्छीके भुरा डारल फर्मके संचालक शिवाकोटी बटैलै ।

सुमन तीन बरष आघे संचालन करल उ फर्ममे बोयर जातके पाँचठो छेगरी, एकठो छेगरा ओ स्थानीय छेगरी दशठो पालके कृषि पेशा सुुरु करल जनैलै । उहाँ कहलै, ‘छेगरी बेंचके मासिक २५ से ३० हजारसम आम्दानी हुइटी बा, अब्बेसम ९० ठो छेगरा विकसेकल बाटै । फर्ममे बोयर जातके ३९ ठो माउँछेगरी ओ छेगरा छेगरीया कैके ७० ठो छेगरा छेगरी रहल उहाँ बटैलै ।

लोकल मुर्गी पालनफे सुरुवाट करल उहाँ फर्म पाँच सय लोकल मुर्गीसंगे दुई सयठो बटैं, २० ठो कडकनाथ मुर्गी, १५ ठो टर्की ओ लौकाटफे पालल संचालक जनैलै । चार कठ्ठा जग्गामे दुईठो पोखरी बनाके मच्छी फेन पल्टी बटैं । पोखरामे रोहु, कमनकार, ग्रास ओ मंगरा जातके मच्छी पल्टी बटैलंै । मच्छीपालनसे बार्षिक डेढ लाखसम आम्दानी हुइटी रहल बटैलैं ।

पशुपालनमे रेखदेख करक लाग पुर्णरुपमे एक जाने ओ आंसिक रुपमे दुई जहन रोजगार करटी रहल ओ अपने परिवारके चार जाने सदस्यहुक्रेफे ओहे फर्ममे काम करटी बटैं । सुमन शिवाकोटीे नेपाल सरकार भेटनरी अस्पताल तथा पशुसेवा विज्ञ केन्द्र, कञ्चनपुरसे स्थानीय मुर्गा पालनमे प्रवद्र्धन कार्यक्रम अन्तर्गतसे एक लाख रुपिया अनुदान फेन पैले बटैं ।

ओस्टके कैलालीके कैलारी गाउँपालिका–४, नवलपुरके युवा खुशीराम चौधरीफे पाँच बर्ष लगाके कटारमे कमाइल रुप्या व्यापारमे लगानी कर्ले बटैं । उहाँ पाँच बरषसे कैलारी गाउँपालिका–१, हसुलिया बजारमे खुशी ट्रेडर्स एण्ड स्टिल सप्लायर्स सञ्चालन करटी बटैं । दश लाखके लगानीसे सुरु करल हार्डवेयर डुकान अझकल २० लाखसे ढेर लगानीमे कारोबार करटी बटैं ।

अब्बे हार्डवेयरके व्यापार ठिकठिके चल्टी रहल चौधरी बटैलैं । डुकानके आम्दानीसे चार कोठक् पक्की घर बना सेक्ले बटैं । डोकानमे एकजहन फे रोजगार डेले बटैं । डोकानमे उहाँक् गोसिनियाँ सोनम चौधरी सहयोग करटी बटिन् ।