नेपाल स्काउट सुदूरपश्चिम प्रदेश समितिके दीक्षान्त
धनगढी, २० अगहन । संघीयताके कार्यान्वयनसँगे नेपाल स्काउट प्रादेशिक संरचनामे गिल बा ।
जिल्ला तहमे सीमित स्काउट प्रदेश तथा स्थानीय तहमे संरचना विस्तार करटी सुदूरपश्चिम प्रदेश तदर्थ समितिके संयोजक तथा सदस्य एवं सल्लाहकारहुक्रे शुकके रोज दीक्षान्त एवं पद तथा गोपनीयताके शपथग्रहण करले बाटैं ।
संविधान ओ संकीयताके मर्म अनुसार शुके स्काउट सुदूरपश्चिम प्रदेश तदर्थ समितिके पदाधिकारीहुक्रे गोपनीयताके शपथग्रहण करल हुइट ।
नेपाल स्काउटके राष्ट्रिय संयोजक लोकबहादुर भण्डारी प्रदेश स्काउट संरक्षक तथा सुदूरपश्चिम प्रदेशके मुख्यमन्त्री त्रिलोचन भट्ट ओ प्रदेशके प्रमुख स्काउट तथा सामाजिक विकास मन्त्री कृष्णराज सुबेदीहे दीक्षित करैलैं ।
राष्ट्रिय संयोजक लोकबहादुर भण्डारीके रोहबरमे प्रमुख स्काउट तथा सामाजिक विकास मन्त्री कृष्णराज सुबेदी उहाँहुकनहे शपथ करैलैं ।
कार्यक्रमहे सम्बोधन करटी मुख्यमन्त्री त्रिलोचन भट्ट सुन्दर, शान्त, समृद्ध ओ सभ्य प्रदेश बनैनामे भूमिका खेल्ना स्काउटके प्रतिनिधिहुकनहे आग्रह करलैं । युवा तथा विद्यार्थीहे अनुशासित बनाके सभ्य समाज निर्माणके भूमिकामे रहना उहाँ निर्देशन डेलैं ।
अस्टेक सुदूरपश्चिमके स्काउट संयोजक नरेन्द्र थापा समुन्नत समाज निर्माणके लाग स्काउट भूमिका खेल्ना बटैलैं । उहाँ प्रदेशके ८८ ठो स्थानीय तहके स्कुलमे स्काउटके कमिटी गठन करना प्रतिबद्धता जनैलैं ।
सुदूरपश्चिम प्रदेश स्काउट संयोजकमे नरेन्द्र थापा, सदस्यमे क्रमशः रमेश सिंह, खुसीरानी चौधरी, तारा थापा, सुवर्ण श्रेष्ठ, राजकुमारी महतो, पदम धामी, जमुना परियार, चन्द्राकुमारी भण्डारी, सुनिल परियार ओ गजेन्द्र शाही बाटैं ।
