आठ महिनासे बन्द टीकापुर पार्क खुलल

टीकापुर, २० अगहन । कैलालीके मुख्य पर्यटकीय गन्तव्यके रुपमे रहल टीकापुर पार्क आठ महिनापाछे खुलल बा । कोरोना भाइरस संक्रमणके कारण आठ महिनासे पार्क बन्द रहे ।

आन्तरिक पर्यटकके लाग महत्वपूर्ण टीकापुर पार्कमे वार्षिक दुई लाखसे ढेर पर्यटक पार्कके अवलोकन करटी आइल तथ्यांक नगरपालिकासँग बा । लम्मा समयसे टीकापुर पार्क खुले परना आवाज उठ्टी अइलओरसे नगरपालिका स्वास्थ्य सुरक्षाके मापदण्ड अपनाके पार्क खुल्ला करल बटैले बा ।

नयाँ वर्ष ओ दशैँतिहारके समयमे पार्क अवलोकनमे अइनाके भिड लग्ना हुइलेसे फेन यी वर्ष उ अवधिमे पार्क सुनसान रहल । नगरपालिकाके वार्षिक ५० लाख रुप्या आम्दानी हुइना पार्कसे गैल वर्ष २० लाख फेन आम्दानी नैहुइल । यी वर्ष टे और फेन आम्दानी हुइना अवस्थामे नैरहल पार्कमे कार्यरत विनोद चौधरी बटैलैं । नयाँ वर्ष ओ दशैँतिहारके समयमे किल पार्क २० लाखसे ढेर आम्दानी करठ ।

औरे वर्षजस्टे पार्कमे अइना पर्यटकहे यी वर्ष पार्क बन्द रहल जानकारी नैहुइल ओरसे पार्क पुग्टी लौटैं । बन्दाबन्दी खुललसँगे टीकापुर पार्कमे पर्यटकके आगमन शुरु हुइलेसे फेन पार्कके मूल ढोका बन्द हुके ओहैंसे पर्यटक लौटिट । दाङ, सुर्खेत, नेपालगञ्ज, बर्दिया, कञ्चनपुरलगायतके क्षेत्रसे अवलोकनके लाग आइल पर्यटक पार्क अवलोकन नैकरके लौटल चौधरी बटैलैं । पार्कके अवलोकन समय बिहान ७ बजेसे साँझ ५ बजेसम खुल्ला करल जनागिल बा ।